Անտեր մնացած լիազորություն

Երեւանում բազմաթիվ դպրոցների դիմաց թեեւ կան հետիոտների համար նախատեսված անցումներ, սակայն դրանք բավարար չեն երեխաների անվտանգությունն ապահովելու համար: Դպրոցներին կից վերգետնյա կամ ստորգետնյա անցումների կառուցումը պարզապես անհրաժեշտություն է:

Խանջյան փողոցում գտնվող երեք դպրոցների` Սպենդիարյանի անվան երաժշտական դպրոցի, Ձայնի պահպանման դպրոցի եւ թիվ 3 հանրակրթական դպրոցի, Տիգրան Մեծի պողոտայում գտնվող Բենիամին Ժամկոչյանի անվան թիվ 119 ավագ, ինչպես նաեւ բազմաթիվ այլ դպրոցների հարակից տարածքներում անցումներն ու լուսացույցներն ընդհանրապես բացակայում են:

Yerkir.am-ի հետ զրույցում դպրոցների տնօրենները պատմեցին, որ անցումների բացակայության պատճառով եղել են պատահարներ: Քաղաքապետարան ուղարկված իրենց դիմումները մերժվել են` պատճառաբանությամբ, թե վերգետնյա անցում կառուցելն այդ հատվածներում նպատակահարմար չէ, քանզի դպրոցները գտնվում են անցումների հարեւանությամբ:

Խանջյան փողոցում գետնանցում կա Խանջյան-Վարդանանց խաչմերուկում: Բայց դպրոցից միայնակ դուրս եկած երեխան մինչեւ Վարդանանց չի քայլելու` ինչ է թե անցումով հատի փողոցը, այլ միանգամից մեքենաների միջով «ճղելու» է փողոցը, ինչն անում են մեծահասակները:

Մեկ շաբաթ է, ինչ մենք փորձում ենք պարզել, թե ո՞ր կառույցն է իրավասու զբաղվել անցումների շինարարության հարցով: Սկզբում դիմեցինք Երեւանի քաղաքապետարանի քաղաքաշինության վարչություն, հետո տրանսպորտի վարչություն, սակայն մեզ ասացին, թե քաղաքապետարանն այդպիսի խնդիրներով չի զբաղվում: Քաղաքաշինության նախարարությունում գործը գցեցին տրանսպորտի նախարարության վրա: Այստեղ մեզ ասացին, թե դա Ճանապարհաշինական վարչության խնդիրն է: Ճանապարհաշինական վարչությունն էլ ասաց, որ դիմենք քաղաքապետարան: Այդպես էլ չկարողացանք պարզել, թե ովքեր են զբաղվում անցումների խնդրով:

Երեւի կառավարության կազմն ընդլայնման կարի՞ք ունի, ասենք` կարելի է ստեղծել գետնանցումների նախարարություն: