Իրանը Ռուսաստանի հետ ԱԷԿ-ներ կառուցելու բանակցություններ է վարում

Իրանի նախագահ Մահմուդ Ահմադինեժադը խոստովանել է, որ Ռուսաստանի հետ նոր ատոմակայաններ կառուցելու ակտիվ բանակցություններ է վարում. տեղեկացնում է RussiaToday հեռուստաալիքը:

«Ատոմակայաններ կառուցելու մեր սեփական ծրագրերն ունենք, սակայն, անկասկած, օգտագործելու ենք միջազգային մասնագետների փորձը»,- ասել է Ահմադինեժադը` միաժամանակ հավելելով, որ իրենք ոչ մեկից կախում չունեն, հույսը ոչ մեկի վրա չեն դրել:

Հիշեցնենք, որ ռուսների հետ համատեղ կառուցվող Բուշերի ատոմակայանը վերջերս է միացվել Իրանի էներգետիկ համակարգին: Այն երկրի միջուկային ծրագրի բաղկացուցիչ մասն է, եւ Արեւմուտքում կարծում են, որ Բուշերի տեխնոլոգիաները կարող են կիրառվել միջուկային զենք ստեղծելու համար: