Թուրքիան բանակցություններ է վարում ռուսական «Ս-400»-ների երկրորդ խմբաքանակի մատակարարման շուրջ. ԶԼՄ-ներ

Թուրքիայի ռազմական գնումների գործակալության ղեկավար Իսմայիլ Դեմիրը հայտարարել է, որ Թուրքիան դեռ բանակցություններ է վարում Ռուսաստանի հետ՝ «Ս-400» հակահրթիռային համակարգերի երկրորդ խմբաքանակի գնման համար՝ չնայած ուկրաինական պատերազմին, հաղորդում է պետական TRT հեռուստաալիքը։

Դեմիրն ասել է, որ 2017 թվականի պայմանագիրը թույլ է տալիս Թուրքիային ռուսական հակահրթիռային պաշտպանության համակարգերի երկու մարտկոց ստանալ։

«Մենք երկրորդ նախագիծ ստեղծելու մասին չենք խոսքում,- ասել է Դեմիրը։- Թուրքիան շարունակում է իրականացնել նույն որոշումը, որն ընդունել էր ամենասկզբից»:

Ընդ որում, Դեմիրը հայտնել է, որ Թուրքիան մոտ ապագայում չի ստանա ռուսական «Ս-400»-ների երկրորդ խմբաքանակը՝ պայմանագրի հետ կապված որոշ հարցերի պատճառով։

Վաշինգտոնը գործակալության եւ Դեմիրի նկատմամբ պատժամիջոցներ էր սահմանել ԱՄՆ նախագահ Դոնալդ Թրամփի վարչակազմի վերջին շաբաթներին՝ «Ս-400»-ների գնման համար:

Ավելի վաղ ԱՄՆ նախագահ Ջո Բայդենի վարչակազմը հայտարարել էր, որ Թուրքիային F-16 կործանիչների հնարավոր վաճառքը կհամապատասխանի ԱՄՆ ազգային անվտանգության շահերից, ինչպես նաեւ կծառայի ՆԱՏՕ-ի երկարաժամկետ միասնությանը, նշում է Ahval-ը: