Թուրքիան բանակցություններ է վարում Ուկրաինայի և Ռուսաստանի հետ հացահատիկային միջանցքի շուրջ

Անկարան բանակցություններ է վարում Կիևի և Մոսկվայի հետ Ուկրաինայից հացահատիկի արտահանման համար Թուրքիայի տարածքով միջանցք բացելու շուրջ։ Այս մասին հինգշաբթի Reuters-ին հայտնել է թուրք բարձրաստիճան պաշտոնյա։

«Թուրքիան բանակցություններ է վարում ինչպես Ռուսաստանի, այնպես էլ Ուկրաինայի հետ Ուկրաինայից հացահատիկի արտահանման շուրջ»,- ասել է պաշտոնյան՝ ցանկանալով անանուն մնալ։

Նրա խոսքով՝ բանակցությունները դեռ շարունակվում են։

Սև ծովում ուկրաինական նավահանգիստները արգելափակվել են փետրվարին ռուսական ներխուժումից հետո, և այնտեղ մնացել է ավելի քան 20 միլիոն տոննա հացահատիկ։

Ռուսաստանի փոխարտգործնախարար Անդրեյ Ռուդենկոն չորեքշաբթի հայտարարել էր, որ Մոսկվան պատրաստ է միջանցք տրամադրել պարենամթերք տեղափոխող նավերին՝ արևմտյան որոշ պատժամիջոցների չեղարկման դիմաց։

Ուկրաինայի արտաքին գործերի նախարար Դմիտրի Կուլեբան կոչ է արել չտրվել Ռուսաստանի շանտաժին։