Թուրքիան` իսլամական ժողովուրդների դահիճների մեղսակից

Սեպտեմբերի 2-ին, այն օրը, երբ հայտարարվեց Ստամբուլից բարձրաստիճան իսրայելցի դիվանագետներին արտաքսելու մասին, Թուրքիայի կառավարությունը համաձայնեց ամերիկյան հակահրթիռային համակարգ տեղակայել իր տարածքում:

Ինչպես տեղեկացնում է mignews.com-ը, դա արժանացել է Իրանի բացասական արձագանքին, որի հրթիռների դեմ, առաջին հերթին, կուղղվեն ամերիկյան հզոր ռադարները:

Երեկ Իրանի պաշտպանության նախարար Ահմեդ Վահիդին հանդես է եկել Թուրքիայի այդ որոշման կտրուկ քննադատությամբ: «Մենք ամերիկացիների եւ արեւմտյան այլ պետությունների ռազմական ներկայությունը դիտարկում ենք որպես սկանդալային եւ անհանգստացնող: Դա խարխլում է բոլոր մահմեդական երկրների անվտանգությունը: Ամերիկացիների ձեռքերը մինչեւ արմունկները թաթախված են աֆղանցիների, իրաքցիների եւ պաղեստինցիներ արյունով: Մենք ոչ մի լավ բան չենք տեսնում որեւէ իսլամական երկրի տարածքում նրանց ներկայությունից»,- ասել է նախարարը:

Նա անդրադարձել է նաեւ օգոստոսի 31-ին Ֆրանսիայի նախագահ Նիկոլա Սարկոզիի արած հայտարարությանը, թե Իրանի միջուկային օբյեկտներին հնարավոր է` կանխարգելիչ հարվածներ հասցվեն, նշելով. «Նման արտահայտություններով Արեւմուտքը փորձում է հանրության ուշադրությունը շեղել այն ցեղասպանությունից, որ ինքն է իրականացնում Լիբիայում»:

Նշենք, որ, բացի Իրանից, Թուրքիայում հակահրթիռային համակարգի տեղակայումը մտահոգել է նաեւ Ռուսաստանին: ՌԴ ԱԳՆ-ն հատուկ հայտարարությամբ է հանդես եկել, որում պահանջել է երաշխիքներ, որ այն ուղղված չի լինի Ռուսաստանի ռազմավարական միջուկային ուժերի դեմ: