Իրանի ԱԳՆ-ն ԱՄՆ-ին մեղսակից է համարում Հանիայի սպանությանը

Իրանի արտաքին գործերի նախարարությունը Թեհրանում պաղեստինյան ՀԱՄԱՍ շարժման քաղբյուրոյի ղեկավար Իսմայիլ Հանիյեի սպանությանը մեղսակից է անվանել ԱՄՆ-ին, փոխանցում է ТАСС-ը։

«ԱԳՆ-ն ընդգծում է ԱՄՆ կառավարության պատասխանատվությունը՝ որպես մեղսակից այս զազրելի ահաբեկչական գործողության իրականացմանը և Սիոնիստական ռեժիմի (նկատի ունի Իսրայելի-խմբ.) կողմից պաղեստինցիների տարածքների բռնազավթման և նրանց ցեղասպանության շարունակությանը: Այս ահաբեկչությունը ոչ միայն միջազգային իրավունքի սկզբունքների ու նորմերի, ՄԱԿ-ի կանոնադրությունը կոպիտ խախտում է, այլև լուրջ վտանգ է միջազգային խաղաղության և տարածաշրջանային անվտանգության համար», - ասված է Իրանի ԱԳՆ-ի հայտարարության մեջ։ 

Թեհրանը ՀԱՄԱՍ-ի քաղբյուրոյի ղեկավարի սպանությունը համարում է «[Իսրայելի] միտումնավոր ցեղասպանության քաղաքականության մի մասը պաղեստինցիների դեմ, հատկապես վերջին տասը ամիսներին Գազայի հատվածում», որը «նպատակ ունի մեծացնել անկայունությունը» Մերձավոր Արևելքում։

Հիշեցնենք՝ Թեհրանում սպանվել է ՀԱՄԱՍ շարժման քաղաքական բյուրոյի ղեկավար Իսմայիլ Հանիան։ Շարժումը հայտարարել է, որ հարձակումը տեղի է ունեցել այն բանից հետո, երբ Հանիան մասնակցել է Իրանի նորընտիր նախագահ Մասուդ Փեզեշքիանի երդմնակալության արարողությանը:

Ավելի վաղ հայտնել էինք՝ Իրանի նախագահ Մասուդ Փեզեշքիանը հայտարարել է, որ կստիպի Իսրայելին զղջալ Հանիեի սպանության համար։

Իր հերթին Իրանի հոգևոր առաջնորդ այաթոլլա Ալի Խամենեին Իսրայելին «խիստ պատիժ» է խոստացել ՀԱՄԱՍ կազմակերպության քաղաքական թևի ղեկավար Իսմայիլ Հանիայի սպանության համար: