ՉՈՐՐՈՐԴ ԻՆՔՆԻՇԽԱՆՈՒԹՅՈՒՆ. Ոստիկանները հարձակվել են ընդդիմադիր ակտիվիստների վրա

Երեկ գիշերը` ժամը 3-ի մոտ, մի խումբ քաղաքացիական հագուստով եւ ոստիկանական համազգեստով անձինք «Նաիրի» կինոթատրոնի մոտ հարձակվել են այդ պահին օգոստոսի 2-ին կայանալիք հանրահավաքի մասին թռուցիկներ փակցնող` Կոնգրեսի երիտասարդ ակտիվիստների վրա: Հարձակման արդյունքում ավելի քան 15 րոպե տեղի է ունեցել քաշքշուկ, ինչի արդյունքում երիտասարդները ստացել են թեթեւ մարմնական վնասվածքներ:

Իսկ երեկ արդեն բռնության ենթարկված ակտիվիստները կատարված հանցագործության մասին հաղորդում են ներկայացրել գլխավոր դատախազին: Կատարվածը դատապարտող հայտարարությամբ է հանդես եկել ՀԱԿ-ը` կոչ անելով իր բոլոր կառույցներին, ակտիվիստներին, հանրահավաքի մասնակիցներին` նմանօրինակ փաստերի մասին անմիջապես տեղյակ պահել Կոնգրեսի կենտրոնական գրասենյակ` հնարավորինս որոշակիացված տվյալներով:

Ինչպես տեղեկացնում են ՀԱԿ-ից, նախօրեին գիշերը ոստիկանների կողմից ընդդիմության ակտիվիստների վրա կատարված հարձակման մասին ընդդիմությունը տեղյակ է պահել երկխոսության համար իշխող կոալիցիայի կողմից ձեւավորված աշխատանքային խմբի ղեկավար Դավիթ Հարությունյանին: