ՀԱՅՈՑ ԱՇԽԱՐՀ. Որոշում կընդունվի

Առաջիկայում Կազանում տեղի ունենալիք` Հայաստանի, Ռուսաստանի եւ Ադրբեջանի նախագահների հանդիպման ժամանակ Լեռնային Ղարաբաղի հակամարտության կարգավորման հիմնարար սկզբունքների նախագծի վերաբերյալ որոշում կընդունվի: Այս մասին հայտարարել է Ռուսաստանի արտաքին գործերի նախարարության պաշտոնական ներկայացուցիչ Ալեքսանդր Լուկաշեւիչը լրագրողների հետ հանդիպման ժամանակ:

«Նախագահների հանդիպումից սպասումները մեծ են: Ձեռք բերված պայմանավորվածությունների համաձայն` հանդիպման ժամանակ, ենթադրվում է, որ կքննարկվի ԼՂ հակամարտության կարգավորման, այսպես կոչված, հիմնարար սկզբունքների ամբողջական նախագիծը»,- ասել է Լուկաշեւիչը:

Նրա խոսքով` այդ փաստաթղթի ձեւակերպումները համաձայնեցվել են երեք երկրների արտգործնախարարների միջեւ ապրիլ եւ հունիս ամիսներին տեղի ունեցած հանդիպումների ժամանակ: «Տեղի ունեցած քննարկումների ժամանակ հաջողվել է մոտեցնել դիրքորոշումները մի շարք կարեւոր հարցերի շուրջ: Նախագահները կքննարկեն այդ ամենը եւ համապատասխան որոշում կընդունեն»,- համոզմունք է հայտնել Լուկաշեւիչը: