Գետը կհոսի բետոնապատ հունով

Թեղուտի անտառներով հոսող Խառատանոց գետը շուտով կհոսի բետոնապատ հունով, որը կառուցվում է «Թեղուտ» ՓԲԸ-ի կողմից:

Գետի հունը բետոնապատվում է Թեղուտի պղնձամոլիբդենային հանքավայրի շահագործման ծրագրի շրջանակներում. իսկ բնական հունի մեջ առաջիկայում կկուտակվեն այս տարածքից արդյունահանվող պղնձամոլիբդենային հանքաքարերի թափոնները:

«Թեղուտ» ՓԲԸ-ի գլխավոր տնօրենի տեղակալ Ռուբեն Պապոյանը, պատասխանելով «ԷկոԼուր»-ի հարցին, հայտնել է, որ շարունակվում է երկու գետերի` Խառատանոցի եւ Դուքանաձորի ջրատարի շինարարությունը, որոնց ջրերը պետք է ջրատար ուղղվեն Խառատաձորի կիրճի մոտից. «Կիրճը պետք է չորացվի եւ օգտագործվի պոչամբարի եւ լցակուտային ապարների համար»:

Թեղուտի բնակիչները, իրենց հերթին, հայտնել են, որ շուրջ մեկուկես տարի իրենք չեն օգտագործում Շնող գետի ջուրը, քանի որ ջրի որակը փոխվել է:

Թեղուտի համայնքապետ Հարություն Մելիքսեթյանն էլ նշել է, որ գյուղը օգտվում է երեք բնական աղբյուրներից. «Երկուսի ջուրը որակյալ խմելու ջուր է, իսկ երրորդինն օգտագործվում է տեխնիկական նպատակներով»:

Ստեփանավան-Նոյեմբերյան խմելու ջրի ջրագիծը, որը գյուղ պետք էր հասներ 2010թ. վերջին, մինչ օրս չի կառուցվել:

Լուսանկարը` Գալուստ Նանյանի