ՀԱՊԿ անդամ երկրների հարևանությամբ ռազմաքաղաքական իրադրությունը զարգանում է բացասական հունով. ՀԱՊԿ միացյալ շտաբի պետ

Հավաքական անվտանգության պայմանագրի կազմակերպության անդամ երկրների հարևանությամբ ռազմաքաղաքական իրադրությունը զարգանում է հիմնականում բացասական հունով: Այս մասին այսօր Մոսկվա-Երևան-Մինսկ-Բիշքեկ-Աստանա տեսակամրջի ընթացքում ասաց ՀԱՊԿ միացյալ շտաբի պետ, գեներալ-գնդապետ Անատոլի Սիդորովը՝ վտանգավոր միտում  համարելով սպառազինությունների վերահսկման  համակարգի շարունակվող փլուզումը:

«Այս գործընթացում գլխավոր դեր է խաղում ԱՄՆ-ը, որը, չնայած ռուսական կողմից գործադրվող միջոցներին, դադարեցրեց իր մասնակցությունը Միջին և փոքր հեռահարության հրթիռների ոչնչացման մասին պայմանագրին, որը ենթադրում է հարվածա-հարձակողական ներուժի ավելացման հնարավորությունների սահմանափակում»,- ընդգծեց նա:

Ըստ Սիդորովի՝ Վաշինգտոնի նմանօրինակ  քայլերը մտահոգություն են առաջացնում անգամ դաշնակիցների շրջանում։ Բացի այդ` ՆԱՏՕ-ն Արևելյան Եվրոպայի երկրներում մտադիր է լրացուցիչ ուժեր տեղակայել, ընդ որում՝ ՀԱՊԿ մասնակից երկրների հարևանությամբ, ինչը նույնպես անհանգստության տեղիք է տալիս:

«Ուկրաինայի ղեկավարությունը փորձում է իր ռազմական կազմավորումները համապատասխանեցնել ՆԱՏՕ-ի չափորոշիչներին, սա ապակայունացման օջախներից մեկն է ՀԱՊԿ երկրների սահմանին»,- հավելեց գեներալը։

Այս համատեքստում Անատոլի Սիդորովը նշեց, որ բարդ իրադրությունը պահպանվում է նաև Կովկասյան տարածաշրջանում, և որ անվտանգության մարտահրավեր է շարունակում մնալ իրավիճակն Աբխազիայում և Հարավային Օսիայում։

«Վրաստանը իբրև թե պատրաստակամություն ցուցադրելով, միաժամանակ կասեցնում է բանակցային գործընթացը՝ հրաժարվելով պարտավորություններ ստորագրել Աբխազիայի և Հարավային Օսիայի նկատմամբ ուժ չկիրառելու մասին։ Բացի այդ` ԱՄՆ ղեկավարությունն ակտիվորեն սատարում է Վրաստանի հակառուսական քաղաքականությանն ու ՆԱՏՕ մտնելո`ւ Թբիլիսիի ձգտմանը»,- շեշտեց Սիդորովը՝ հիշեցնելով ՆԱՏՕ-ի գլխավորությամբ երկրի տարածքում մի քանի տարի անցկացվող բազմազգ զորավարժությունները:

Ըստ ՀԱՊԿ միացյալ շտաբի պետի` Միջին Ասիայի համար  հիմնական վտանգ է չդադարող զինված հակամարտությունն Աֆղանստանում, քանի որ նկատվում է «Թալիբան» և «Իսլամական պետություն» ահաբեկչական խմբավորումների գործունեության ակտիվացում Աֆղանստանի հյուսիսում, որը սահմանակից է ՀԱՊԿ անդամ երկրներին։