Վերլուծում են չկայացած հանդիպումը

Մայիսի 13-ին մամուլում լուրեր տարածվեցին, թե Իրանի Իսլամական Հանրապետության նախագահի հատուկ բանագնաց, արտաքին գործերի փոխնախարար Մոհամադռեզա Ռաուֆ Շեյբանին Երեւանում Հայաստանի բարձրաստիճան պաշտոնյաների հետ հանդիպումներից հետո հանդիպել է նաեւ ՀՀ երկրորդ նախագահ Ռոբերտ Քոչարյանի հետ:

Ըստ ենթադրությունների` քննարկվող հիմնական թեման եղել է Հայաստանի ներքաղաքական իրավիճակը: Նշվում էր նաեւ, թե Հայաստանի իշխանությունները փորձել են ամեն ինչ անել Մոհամադռեզա Ռաուֆ Շեյբանիի օրակարգից Ռ. Քոչարյանի հետ նախատեսված հանդիպումը հանելու համար, սակայն դա նրանց չի հաջողվել:

«Երկիր»-ի հարցմանն ի պատասխան` Հայաստանի երկրորդ նախագահ Ռոբերտ Քոչարյանի գրասենյակի ղեկավար Վիկտոր Սողոմոնյանը կտրականապես հերքեց այդ տեղեկատվությունը: Նրա խոսքերով՝ Ռոբերտ Քոչարյանը որեւէ նման հանդիպում չի ունեցել:

Ուշագրավ է մեկ այլ հանգամանք. հանդիպում չի կայացել, բայց դա չի խանգարել հայաստանյան որոշ լրատվամիջոցների վերլուծության ենթարկել հանդիպման արդյունքները եւ «պարզել», թե Ռոբերտ Քոչարյանի «հանդիպումը» որ կուսակցության վրա ինչպիսի ազդեցություն է ունեցել: