Գետաշենը` դարպաս, Մարտունաշենը` այդ դարպասի կողպեք

Գետաշենը եղել է Ղարաբաղի և Հայաստանի դարպասը, իսկ Մարտունաշենը` այդ դարպասի կողպեքը: Այսօր լրագրողների հետ հանդիպման ժամանակ Շահումյան-Գետաշեն հայրենակցական կուսակցության նախագահ Էդիկ Բալայանը, ինքնապաշտպանական մարտերի ականատեսներ` Գետաշեն միջնակարգ դպրոցի նախկին տնօրեն, ինքնապաշտպանական մարտերի մասնակից Շմավոն Ղուլղազարյանը, Մարտունաշենի ինքնապաշտպանության ղեկավար Արմեն Պողոսյանը պատմեցին 1988 թվականի այդ հերոսական գործողությունների մասին:

Նրանց խոսքերով` հայրենի գյուղերի ինքնապաշտպանական մարտերին մասնակցել է ամբողջ բնակչությունը` թե' կանայք, թե' երեխաները, թե' ծերերը:

Ըստ Արմեն Պողոսյանի` իրենք կարող էին պաշտպանել գյուղը, մինչեւ վերջ այն չհանձնել թշնամուն, սակայն որոշ սխալների պատճառով դա չհաջողվեց: Իսկ հիմնական պատճառը ռուսական զորքերն էին, որոնք ադրբեջանցիների հետ մեկտեղ շրջապատել էին Գետաշենը. ռուսական բանակի դեմ կռվել իրենք չէին կարող և ստիպված լքեցին գյուղը:

Հանդիպման ժամանակ անդրադարձ եղավ նաեւ ղարաբաղա-ադրբեջանական զինված ուժերի շփման գծում հայ զինվորների սպանությանը: Ինքնապաշտպանական մարտերի մասնակիցների կարծիքով` հակահարված անպայման կլինի, մեր զինվորների մահն անպատիժ չի մնա: