ՉՈՐՐՈՐԴ ԻՆՔՆԻՇԽԱՆՈՒԹՅՈՒՆ "Գայիշնիկների" դարաշրջանն ավարտվեց

«Չե՞ք կարծում, որ Հայաստանում ընդհանրապես  պետք է լուծարել ճանապարհային ոստիկանության համակարգը, քանի որ այն միայն լրացուցիչ եւ ահռելի ծախսեր է պահանջում համակարգից»,- շաբաթ օրը Ծաղկաձորում կայացած ԶԼՄ-ների ներկայացուցիչների հետ հանդիպման ժամանակ հարցրինք ՀՀ ոստիկանապետ Ալիկ Սարգսյանին:

Ի պատասխան` վերջինս ասաց, որ այս տարվա վերջին Հայաստանում այլեւս չի լինելու ճանապարհային ոստիկանության ծառայությունը, այսինքն` «գայիշնիկներն» այլեւս չեն պտտվելու փողոցներում:

Համակարգում ծավալվող բարեփոխումների շրջանակներում Հայաստանում ներդրվելու է «պատրուլի» ինստիտուտը (այն արդեն վաղուց շատ արդյունավետորեն գործում է հարեւան Վրաստանում):  Բոլոր փողոցներում տեղադրված են լինելու տեսանկարահանող սարքեր, իսկ համապատասխան ծառայությունը էլեկտրոնային քարտեզների միջոցով վերահսկելու է իրավիճակը:

Այս նոր համակարգի ներդրումից հետո ոստիկանն այլեւս չի շփվելու վարորդի հետ: Տուգանքի առաջացման դեպքերում ոստիկանները համապատասխան ծանուցագրերը` տուգանքի չափերով, փակցնելու են ավտոմեքենայի ապակուն, իսկ վարորդն այն մուծելու է բանկային հաշվեհամարին:

Տեխզննման կայանները կենտրոնանալու են մեկ շենքում, շենքը նոր է կառուցվում, այն լինելու է թափանցիկ` ապակիներով: Այնտեղ աշխատելու են  հիմնականում բարետես աղջիկներ եւ կանայք, որոնք 5-10 րոպեների ընթացքում սպասարկելու են քաղաքացուն: