Այցելուները կշրջեն ուրարտական ռազմակառքերով

Այս տարի Էրեբունի արգելոց-թանգարանը կկազմակերպի վերջին շրջանում Էրեբունի պետական արգելոցում եւ դրա մասնաճյուղերում` Շենգավիթի եւ Կարմիր բլուրի հնավայրերում կատարված պեղումների ընթացքում հայտնաբերված հնագիտական գտածոների ցուցադրություններ:

Ինչպես «Երկիր»-ին հայտնեց արգելոց-թանգարանի տնօրեն Գագիկ Գյուրջյանը, վերջին երկու տարիներին, ինչպես նաեւ այս տարի հնագիտական պեղումներն իրականացնում են հայ-ֆրանսիական եւ հայ-ամերիկյան արշավախմբերը:

«Այս ընթացքում արշավախմբերը հայտնաբերել են բավական հետաքրքիր սրահներ, փողոցներ: Անգամ անցած տարի մի հետաքրքիր որմնանկար հայտնաբերվեց Խալդի տաճարի թաքնված պատի տակ, որն աքեմենյան շրջանում երեսպատվել էր հումաղյուսի բավական հաստ շերտով: Որմնանկարի հայտնաբերումից հետո, մշակույթի նախարարության ֆինանսավորմամբ, այն անմիջապես առանձնացվեց պատից եւ տեղափոխվեց թանգարանի ֆոնդ` մշակման համար»,- ասաց թանգարանի տնօրենը:

Նրա խոսքերով` Էրեբունու միջնաբերդը լիարժեք պեղված է 65-70 տոկոսով, միայն միջնաբերդի պաշտամունքային հատվածի 25-30 տոկոսն է, որ կուսական վիճակում է:

Գ. Գյուրջյանը հավելեց, որ ներկայումս անհրաժեշտություն կա վերականգնել ամբողջ միջնաբերդը` այն բերելով 1968 թվականի վիճակին. «Միջնաբերդի վերականգնման եւ վերստեղծման հետ կապված` առաջարկել ենք 400 մլն դրամի 3 տարվա ծրագիր: Մասնակի կվերականգնվեն Խալդի տաճարի սյուները եւ ծածկը, որմնանկարները, ինչպես նաեւ տաճարի կողքին գտնվող Արգիշտիի պալատը»:

Թանգարանի տնօրինությունը նախատեսել է, ներգրավելով մասնավոր ներդրողների, թանգարանի տարածքում կառուցել ամֆիթատրոն, որտեղ կներկայացվեն Էրեբունիի պատմությանը վերաբերող ներկայացումներ: Բացի այդ` արգելոց թանգարանի տարածքում այցելուները կշրջեն ուրարտական ռազմակառքերով:

«Երեխանների համար կստեղծվի արհեստական հնավայր-դպրոց, որտեղ նրանք կսովորեն պեղումներ իրականացնել»,- ասաց Գ. Գյուրջյանը` նշելով, որ աշխատանքներեն իրականացվում, որ թանգարանն այսուհետ հասու լինի նաեւ հաշմանդամներին: