Ի՞նչ երազ են տեսել թուրք պաշտոնյաները

Թուրքիայի պետնախարար եւ փոխվարչապետ Բյուլենթ Արընչը, ելույթ ունենալով Ստամբուլում անցկացվող` աշխարհի ներկա եւ նախկին առաջնորդների գագաթաժողովում, ի թիվս այլ հարցերի անդրադարձել է Հայաստան-Թուրքիա հարաբերությունների կարգավորմանը:

«Անկարան շարունակում է հետամուտ լինել «զրո խնդիր հարեւանների հետ» քաղաքականությանը եւ կողմնակից է տարածաշրջանային ու, ընդհանրապես, համաշխարհային խաղաղությանը»,- ասել է Բյուլենթ Արընչը` նշելով, որ Թուրքիան Հայաստանի հետ խնդիրներ ունի եւ կամենում է ու պարտավոր է լուծել դրանք. տեղեկացնում է թուրքական Habergec լրատվական գործակալությունը:

Պետնախարարը նաեւ հայտարարել է. «Անցյալում այս հողերում հայեր են ապրել, ընդ որում` մեծ թվով: Կառավարությունում հայ նախարարներ են եղել: Ունեցել ենք հայ երաժիշտներ: Մեր պալատները կառուցող ճարտարապետները հայ են եղել: Նրանք բոլորն էլ այս երկրի հարստությունն էին: Նրանք գնացին, ու մենք զրկվեցինք մեր այդ հարստությունից»:

Արընչը նշել է, որ անկախ այն բանից, թե ովքեր են մեղավոր, Թուրքիան ջանալու է կարգավորել իր հարաբերությունները հարեւան Հայաստանի հետ: