25 տոկոս զեղչ` ուսանողներին

Հետայսու բարձր առաջադիմություն ունեցող առաջին կուրսեցիները կարող են դիմել Հայաստանի երիտասարդական հիմնադրամ եւ, եթե բախտը ժպտա, գուցե ստանան ուսման վարձի 25 տոկոս զեղչ:

«Մեր գործունեությունը ծնունդն է այն քաղաքականության, որը վարում է մեր երիտասարդությունը, եւ որի պատասխանատուն հենց երիտասարդներն են. «Երիտասարդները երիտասարդների համար» կարգախոսով ենք առաջնորդվում: Նրանք պետք է հասկանան, որ եթե ուզում են սովորել, պետությունն անպայման կաջակցի իրենց»,- այսօր լրագրողների հետ հանդիպման ժամանակ հայտարարեց հիմնադրամի համակարգող Կարեն Ավագյանը:

Ծրագրի գաղափարը ՀՀ նախագահինն է: Այն իրագործելու համար հատկացվել է 60 մլն դրամ, այսինքն` մոտ 600-700 ուսանող կստանա զեղչ:

Հիմնադրամի հասարակության հետ կապերի բաժնի ղեկավար Տաթեւիկ Հարությունյանը նշեց, որ կարեւոր է ուսանողի պատասխանատվությունը, այսինքն` ուսանողը պետք է հասկանա, որ չպետք է սովորի` իր խնդիրները ծնողների, հիմնադրամի ուսերին բարդելով, այլ նաեւ` անձամբ տարբերակներ գտնի, ինչին էլ աջակցում է հիմնադրամի սոցիալական ուղղությունը:

«Մենք աշխատում ենք 5 ուղղությամբ` կրթություն եւ գիտություն, առողջապահություն, հոգեւոր-հայրենասիրական, սոցիալական եւ միջազգային համագործակցություն: Որեւէ ուղղություն ֆավորիտ չէ, աշխատանքը համակարգված բնույթ է կրում»,- ասաց Տ. Հարությունյանը:

Ներկայումս հիմնադրամը համագործակցում է նաեւ կրթության եւ գիտության նախարարության հետ` մարզերի ուսանողներին տրամադրելով հանրակացարաններ:

«Առանձնացնել սոցիալական եւ երիտասարդության խնդիրները դժվար է, քանի որ երիտասարդներն էլ այժմ շատ սոցիալական խնդիրներ ունեն: Մենք հասկանում ենք, որ միանգամից բոլոր հարցերը լուծել  հնարավոր չէ, բայց հավաստիացնում եմ, որ մեր իրականացրած ծրագրերի պտուղները շատ քաղցր են»,- ասաց Կարեն Ավագյանը: