Դատական համակարգի նկատմամբ վստահության պակաս կա

Դատական համակարգի նկատմամբ վստահության պակասի խնդիր ունենք, թեեւ լավ է, որ փորձում են հարցերը լուծել դատական ատյանների միջոցով. այսօրվա ասուլիսում անդրադառնալով «Հայկական ժամանակ» օրաթերթի դեմ դատարանի կայացրած որոշմանը` ասել է ՀՅԴ ԳՄ ներկայացուցիչ Արմեն Ռուստամյանը:

«Իսկ եթե դատարանն անկախության աստիճան չունի, բնականաբար, ցանկացած որոշում էլ հասարակության կողմից չի ընկալվի որպես ճշմարիտ որոշում»,- հավելել է նա` նշելով, որ կա նաեւ երեւույթի մյուս կողմը. «Թերթերն էլ պետք է այնպիսի բաներ տպագրեն, որի համար հետո պատասխան տան: Մենք ունենք բազմաթիվ դեպքեր, երբ թերթերը բաներ են տպում, որ հատուկ վարկաբեկելու նպատակ ունեն: Բացառված չէ, որ պատվեր են ստացել այս կամ այն անձին վարկաբեկելու, այս կամ այն լուրը տարածելու համար: Բայց պատվիրողը պետք է ավելին վճարի` նկատի ունենալով, որ թերթը հետո կարող է տուգանվել»: