Մեր գլխավոր խնդիրը ընտրական պրոցեսի նկատմամբ վստահության վերականգնումն է. Վահան Բաբայան

ԲՀԿ-ն Ընտրական օրենսգրքի հետ կապված քննարկումներ է ունեցել, և կուսակցության մտահոգության կենտրոնում շարունակում է մնալ ընտրական պրոցեսի առավել արդար և թափանցիկ իրականացումը.  Yerkir.am-ի զրույցում նշեց ԲՀԿ մամուլի խոսնակ Վահան Բաբայանը:

 «Մեզ մոտ գլխավոր խնդիրը ընտրական պրոցեսի նկատմամբ վստահության  վերականգնումն է, և մեր բոլոր առաջարկներն ու մոտեցումները  բխում են այդ  հիմնական, հիմնարար ուղղությունից»,- ասաց նա` հավելելով, որ Ընտրական օրենսգրքի վերաբերյալ քննարկումների սկսվելուն պես իրենք անպայման կներկայացնեն իրենց առաջարկները:

«Մենք բավական ակտիվ մասնակցելու ենք այդ գործընթացին և  դրական ենք վերաբերվում այդ փոփոխություններին»,- վստահեցրեց Բաբայանը:

Անդրադառնալով Հայ ազգային կոնգրեսի արած հայտարարությանը, որում ՀԱԿ-ը հստակեցնում է, թե երբ «իմաստ կունենա» նոր Ընտրական օրենսգրքի մշակման գործընթացը, նա նշեց, որ քաղաքական այդ ուժն ամեն քաղաքական իրադարձության վերաբերյալ ունենում է իր յուրովի դիրքորոշումը:

«Ես որևէ ցանկություն չունեմ նրանց հետ բանավիճելու կամ նրանց բաներ ապացուցելու: Մենք մեր դիրքորոշումը վաղուց հայտնել ենք և ասել, որ  մենք կողմ ենք եղել սահմանադրական բարեփոխումներին, և այդ բարեփոխումների իմաստից էլ բխում է Ընտրական օրենսգրքի փոփոխությունը: Ուրիշ բան է, որ այնտեղ կան կետեր, որոնց  շուրջ մենք պետք է քննարկումներ անենք, առաջարկներ ներկայացնենք, որպեսզի այդ օրենսգիրքը լինի առավել ընդունելի բոլորի համար»,- ընդգծեց ԲՀԿ-ականը: