ԼՂՀ պաշտպանության նախարարը ամփոփեց տարին

Այսօր հրավիրած մամուլի ասուլիսի ժամանակ հայտարարել է ԼՂՀ պաշտպանության նախարար Մովսես Հակոբյանը` մատնանշելով առաջնագծում հակառակորդի ակտիվ գործողությունները, բանակի առջեւ դրված բազմածավալ խնդիրները, ինժեներական մեծածավալ աշխատանքները եւ ֆինանսատնտեսական ճգնաժամի հետեւանքով առաջացած տնտեսական եւ նյութական միջոցների որոշակի սղությունը:

Այդ ամենով հանդերձ, ըստ նախարարի, Պաշտպանության բանակն իր առջեւ դրված խնդիրը կատարել է. ապահովել է ԼՂՀ ժողովրդի անվտանգությունը, ԼՂ եւ ՀՀ քաղաքական իշխանությունների համար հնարավորություն է ստեղծել ակտիվ արտաքին քաղաքականություն վարելու համար, ինչպես նաեւ առաջնագծում միշտ կարողացել է լինել պարտադրողի դերում:

Առաջնագծում կրակոցների թիվը 2010-ի համեմատ ավելացել է 53 տոկոսով (արձանագրվել է 5871 խախտում), սակայն դրանք հիմնականում ոչ դիպուկ կրակոցներ էին: «Այս տարի մեզ մտահոգել են դիվերսիոն հետախուզական խմբերի գործողությունները. հետպատերազմյան ողջ ընթացքում այդքան դիվերսիոն հետախուզական խմբերի ներթափանցման փորձ չի իրականացվել»,-նշել է Պաշտպանության նախարարը` հավելելով, որ դրանք կանխվել են (այդպիսի դեպքերը 30-նն էին), բացառությամբ մեկ դեպքի` 6-րդ պաշտպանական շրջանում, երբ հակառակորդի դիվերսիոն խումբը հնարավորություն է ունեցել ներթափանցել դիրք, սպանել եւ վիրավորել 4-ական զինվորի` դիրքում թողնելով 1 դիակ:

Բոլոր այդ դեպքերին ՊԲ հատուկ ստորաբաժանումները պատասխան գործողություններ են իրականացրել, որոնց արդյունքում հակառակորդին վնաս է պատճառվել` զոհերի քանակով` 41, իսկ վիրավորների` 23: Իսկ հակառակորդի դիվերսիոն գործողությունների արդյունքում եւ դիպուկահարների կրակոցներից զոհվել է 7 զինվոր, վիրավորվել` 8-ը, որոնցից 4-ական` 6-րդ պաշտպանական շրջանի դեպքի արդյունքում,-տեղեկացրել է Մ.Հակոբյանը: