Արտահանվող պանիրն էժանացել է` ի հեճուկս ներքին շուկայի գների

«Գարնանը պանիր չի լինի»,- համոզված են Հայաստանի պետական ագրարային համալսարանի մասնագետները: Պանրի թանկացումն ագրարային համալսարանի պարենամթերքի տեխնոլոգիաների ֆակուլտետի դեկան, պրոֆեսոր Աշոտ Աղաբաբյանը պայմանավորում է պանրի արտահանման ծավալների ավելացմամբ:

«Կաթ չկա պանիր արտադրելու համար, ինչն այս շրջանի համար տրամաբանական է, արտադրողներն էլ հասկացել են, որ հնարավորություն ունեն արտահանել ավելի թանկ, հետևաբար գները բարձրացնում են նաև այստեղ»,- պանրի թանկացման հարցը պարզաբանելով` բացատրեց Աղաբաբյանը:

Սակայն պաշտոնական վիճակագրության տվյալները փաստում են, որ անցյալ տարվա համեմատ պանրի արտահանման գներն այս տարվա առաջին ինն ամիսների տվյալներով որոշակիորեն իջել են: Եթե 2009թ.-ին 1կգ պանրի արտահանման միջին գինը կազմել է 1200 դրամ, ապա այս տարվա ինն ամիսների ընթացքում այդ ցուցանիշը կազմել է 1116 դրամ:

Ստացվում է, որ պանիր արտահանողներն արտաքին շուկայում կրած կորուստները ձգտում են փոխհատուցել ներքին շուկայում գների բարձրացման հաշվին: Թերևս, սա է «Հայկական պանիր» ծրագրի ողջ հմայքը:

Այս թեմայով  տես նաև այստեղ