Ցորենը ցորեն չի՞, կենդանին, որ դա ուտում է, հետո մեզ ինչ-որ բան չի՞ տալիս. Էկոնոմիկայի փոխնախարարը՝ ցորենի փոխարեն ներկրված անասնակերի մասին

«Ինչո՞ւ չի նշվել, որ 4-րդ կարգի ցորեն է բերվել, ինչո՞ւ չի նշվել, որ անասնակեր է ներմուծվելու»,- ճեպազրույցի ժամանակ լրագրողները հարց ուղղեցին Էկոնոմիկայի փոխնախարար Էդգար Զաքարյանին։

«Նշանակում է, որ էդպիսի ցորեն էլ է պետք ՀՀին: Ասվել է՝ ցորեն է գալիս: Ցորենը ցորեն չի՞, կենդանին, որ ուտում է, հետո մեզ ինչ-որ բան չի տալի՞ս, կաթ, կամ...»,- նշեց փոխնախարարը:

Դիտարկմանը՝ ի սկզբանե չի նշվել, որ բարձր որակի չէ, ասաց. «Բայց ինչո՞ւ պետք է նշվեր... Եթե ճանապարհները դիվերսիֆիկացվում են, դա լավ է, իսկ թե այսօր անասնակեր է եկել, վաղն էլ կգա բարձրակարգ ցորեն, էդ էլ արդեն կյանքը ցույց կտա, բայց պարզ է, չէ՞, որ եթե ճանապարհները դիվերսիֆիկացվում են, նշանակում է պետությունը բացվում է, դա լավ է։ Ի՞նչ եք կարծում, որ էդ ցորենը եկել է՝ պե՞տք չի, ուղղակի եկե՞լ է»: