ՌԴ–ն դուրս է եկել Գերմանիայի հետ ռազմատեխնիկական համագործակցության մասին համաձայնագրից

ՌԴ վարչապետ Միխայիլ Միշուստինը դադարեցրել է Գերմանիայի կառավարության հետ ռազմատեխնիկական համագործակցության մասին համաձայնագրի գործողությունը: Ինչպես հայտնում է ՏԱՍՍ–ը, համապատասխան կարգադրությունը ստորագրվել է։

ՌԴ ԱԳՆ-ին հանձնարարվել է գերմանական կողմին տեղեկացնել ընդունված որոշման մասին։

Համաձայնագիրը ստորագրվել է 1996 թվականին։ Մոսկվան և Բեռլինը պայմանավորվել էին, որ կնպաստեն ռուսական և գերմանական ձեռնարկությունների, կազմակերպությունների և գերատեսչությունների միջև ռազմատեխնիկական համագործակցությանը։

ՌԴ արտաքին գործերի նախարարությունում ավելի վաղ նշել էին, որ ներկա պայմաններում համաձայնագիրը կորցրել է իր իմաստն ու գործնական նշանակությունը, բացարձակապես չի համապատասխանում ռուս-գերմանական միջպետական հարաբերությունների ներկա վիճակին, որը ստեղծվել է Գերմանիայի իշխանությունների բացահայտ թշնամական քաղաքականության և գերմանական կառավարության ավելի ու ավելի ագրեսիվ, ռազմատենչ նկրտումների պատճառով:

Արտաքին քաղաքական գերատեսչությունում արձանագրել են, որ Գերմանիայի ղեկավարությունը նպատակաուղղված կերպով իր բնակչությանը հակառուսական գաղափարներ է ներարկում, ռազմաքաղաքական իրավիճակի սրացում հրահրում: