Լավրովն ու Ֆիդանը քննարկել են Մոսկվա-Կիև հնարավոր բանակցությունները

Ռուսաստանի և Թուրքիայի արտաքին գործերի նախարարներ Սերգեյ Լավրովը և Հաքան Ֆիդանը հեռախոսազրույց են ունեցել, որի ընթացքում քննարկել են ՌԴ նախագահ Վլադիմիր Պուտինի առաջարկը՝ մայիսի 15-ին Ստամբուլում Մոսկվա-Կիև բանակցություններ անցկացնելու վերաբերյալ: Այս մասին հայտնել է Ռուսաստանի արտաքին գործերի նախարարության մամուլի ծառայությունը։

Գերատեսչությունների ղեկավարները քննարկել են «Ռուսաստանի և Ուկրաինայի միջև խաղաղություն հաստատելու ջանքերը»։ 

Ռուսաստանը պատրաստ է մայիսի 15-ին Ստամբուլում ուղիղ բանակցություններ վարել, հայտարարել է Պուտինը շաբաթավերջին լրագրողների հետ հանդիպման ժամանակ։

Ուկրաինայի նախագահ Վլադիմիր Զելենսկին հայտարարել է, որ Կիևը կբանակցի միայն 30-օրյա հրադադարի հաստատումից հետո։ Այնուհետև նա խոստացավ անձամբ գալ Պուտինի հետ հանդիպելու մայիսի 15-ին Թուրքիա։

Թուրքիայի նախագահ Ռեջեփ Թայիփ Էրդողանը, իր հերթին, զգուշացրել է Զելենսկուն, որ խաղաղության բանակցություններ սկսելու հնարավորությունը չպետք է բաց թողնել։