Իրանի ԱԳՆ-ն խոսել է ԵԱՏՄ-ի հետ համաձայնագրի իրականացման առավելությունների մասին

Իրանի և ԵԱՏՄ-ի միջև ազատ առևտրի գոտու մասին համաձայնագրի իրականացումը կմեծացնի միության երկրների հետ Թեհրանի առևտրատնտեսական փոխգործակցության ծավալները: Այս մասին РИА Новости-ին հայտնել է Իրանի ԱԳՆ պաշտոնական ներկայացուցիչ Իսմայիլ Բաղային։

Մարտի վերջին ՌԴ փոխվարչապետ Ալեքսեյ Օվերչուկը հայտարարել էր, որ ԵԱՏՄ-ի հետ Իրանի ազատ առևտրի գոտու մասին համաձայնագիրը ուժի մեջ կմտնի մայիսի 15-ին:

«Իրանի և ԵԱՏՄ երկրների միջև այդ համաձայնագրի ուժի մեջ մտնելը կհանգեցնի Իրանի և հինգ երկրի միջև առևտրատնտեսական փոխանակումների զգալի աճի, ուստի մենք վճռական ենք օգտագործել ցանկացած հնարավորություն, որպեսզի մեծացնենք այդ երկրներից յուրաքանչյուրի ներուժի օգտագործման արդյունավետությունը», - ասել է Բաղային:

Նրա խոսքով՝ ԵԱՏՄ-ն առանձնահատուկ արժեք ունի Իրանի համար, քանի որ հող է ստեղծում միավորման անդամների հետ Թեհրանի տնտեսական և առևտրային կապերի ընդլայնման համար:

Հիշեցնենք՝ Իրանի և ԵԱՏՄ-ի միջև ազատ առևտրի գոտու մասին համաձայնագիրը ստորագրվել է 2023 թվականի դեկտեմբերի 25-ին Սանկտ Պետերբուրգում։