Հայաստանը ուրիշ երկրների հետ վիզաների ազատականացման համաձայնագրի իրականացման բեռը չպիտի կրի. Աշոտյան

ՀՀ ԱԺ եվրոպական հարցերի մշտական հանձնաժողովի նախագահ Արմեն Աշոտյանի կարծիքով` վիզաների ազատականացման երկխոսությունը պրոցես է, ու հնարավոր է  մի պահի միանվագ որոշումով դա անել: Այս մասին նա հայտարարեց խորհրդարանում լրագրողների հետ զրույցում:

«ԵՄ մեր գործընկները մեզ ասում են, որ ռեադմիսիայի մասին նախորդ պայմանագիրը  դեռ ամբողջությամբ կյանքի չի կոչվել։ Ճիշտ են ասում, որովհետև այն կյանքի կոչելու համար ժամանակ և իրավական դաշտ է պետք։ Մի շարք ԵՄ երկրների հետ Հայաստանը այդ շրջանակային համաձայնագրից հետո առանձին համաձայնագրեր պիտի կնքի ռեադմիսիայի և վիզաների դյուրացման մասով»,- ասաց Աշոտյանը։

Նրա խոսքով` իրենք եվրոպացի գործընկերներին առաջարկել են այս երկու գործընթացները միաժամանակ իրականացնել։ «Մենք առաջարկել ենք զուգահեռ տանել այս երկու օրակարգերը, որոնք ժամանակատար են։ Մի կողմից աշխատենք եղած համաձայնագրի դյուրացման և ռեադմիսիան լիարժեք կյանքի կոչելու համար, նաև զուգահեռ աշխատանք տանենք վիզաների ազատականցման երկխոսության ուղղությամբ»,- նշեց նա։

Խոսելով գործընթացի դժվարությունների մասին՝ Աշոտյանը նշեց, որ ԵՄ-ն տասնյակհազարավոր օրինակներ է բերում, մասնավորապես` Ուկրաինայի և Վրաստանի չարաշահումների մասով, որոնց հետևանքով ոչ օրինական միգրացիա է տեղի ունենում։

«Նրանք չեն ուզում շտապել, բայց մեր պատասխանը հստակ է՝ Հայաստանը չպետք է կրի այլ երկրների հետ ունեցած խնդիրներ բեռն ու պատասխանատվությունը։ Մեր քաղաքացիների մի մասն էլ կունենա խախտելու գայթակղություն, չեմ ասում, որ բոլորը կլինեն օրինապաշտ, և նման խախտումներ չեն լինի, բայց Հայաստանը ուրիշ երկրների հետ համաձայնագրի իրականացման բեռը չպիտի կրի»,- հավելեց Աշոտյանը։