Իսրայելի քաղաքական ուղերձները Լիբանանի դեմ հետագա հարձակումները արդարացնելու համար են․ Գանտահարյան

Իսրայելական ուժերը վերջին շրջանում երկրորդ հարվածն են հասցնում Լիբանանի մայրաքաղաք Բեյրութին, նախնական տվյալներով կա 3 զոհ: Alpha News-ը «Ազդակ» թերթի գլխավոր խմբագիր Շահան Գանտահարյանի հետ զրույցում փորձել է հասկանալ, թե Բեյրութին թիրախավորելով՝ ում է ուզում վնասազերծել Իսրայելը:

«Այս ամենը հերթական ռազմական գործողությունների ազդակներ են: Հրադադարի պայմանավորվածությունը չի պահպանվում, բայց այնպես էլ չէ, որ նախկին պատերազմական իրավիճակն է: Ճիշտ է, Բեյրութի հարավային արվարձաններում լայնամասշտաբ հարձակումներ, գործողություններ չկան, բայց Իսրայելը շարունակում է թիրախավորված, հատուկ գործողություններ իրականացնել, և Իսրայելի օդուժը շարունակում է սավառնել լիբանանյան տարածքների վրա: Սակայն պետք է նշել, որ հրադադարի համաձայնության մեջ կար հատուկ կետ, ըստ որի՝ երբ կողմերը նկատում են ռազմական առումով որևէ տեղաշարժ կամ նախապատրաստվածություն, կարող են դա չեզոքացնել:

Իսրայելի զորքերը շարունակում են վերահսկել լիբանանյան որոշակի տարածքներ, հատկապես ռազմական առումով կարևոր բլուրներ, հայտարարում են, որ Հյուսիսային Իսրայելի անվտանգությունը չի վերականգնվել, մարդիկ հետ չեն վերադարձել, դրա համար էլ իրենք շարունակում են մնալ լիբանանյան տարածքներում»,- նշել է Գանտահարյանը:

Պատասխանելով Alpha News-ի հարցին, թե Լիբանանը նախապատրաստվո՞ւմ է Իսրայելի կողմից ավելի մեծ հարվածների, Գանտահարյանը պատասխանել է.

«Այդ, վախը, սպառնալիքը կա, որովհետև նաև Թել Ավիվից հնչում են հայտարարություններ, որոնցով պատասխանատվությունը թողնում են Լիբանանի իշխանության վրա, քանի որ, ըստ իրենց, լիբանանյան տարածքներից է հրթիռակոծվում Իսրայելը: Նաև ԱՄՆ-ից հնչեցին հայտարարություններ, որ Լիբանանի կառավարությանը դատի կտան, քանի որ նա է լիբանանյան տարածքներից հրթիռակոծությունների հիմնական պատասխանատուն: Ստացվում է՝ Իսրայելի քաղաքական ուղերձները նրա համար են, որ արդարացնեն Լիբանանի դեմ հետագա հարձակումները»: