Կարևոր է, որ նախարարը իրականացնի կառավարության քաղաքական ուղերձները. Փաշինյանը ներկայացրեց արդարադատության նոր նախարարին

ՀՀ վարչապետ Նիկոլ Փաշինյանն այցելել է արդարադատության նախարարություն, որտեղ ներկայացրել է  նորանշանակ նախարար Ռուստամ Բադասյանին:

Փաշինյանն իր խոսքում նշեց, որ նոր նախարարին ճանաչում է որպես ինտելեկտուալ, կամային հատկանիշներով օժտված, պարտաճանաչ մարդ, ով նաև մասնագիտական բարձր կարողություններ ունի: Նա, ըստ վարչապետի, ՊԵԿ փոխնախագահի պաշտոնում իրեն դրսևորել է լավ կողմերով, ցուցաբերել է կազմակերպական բարձր կարողություններ:

«Կարևոր է, որ այս վճռական փուլում նոր նախարարը պետք է ղեկավարի արդարադատության համակարգի բարեփոխումները: Հայտնի է, որ մենք շրջադարձային փուլում ենք և իշխանությունն ունի քաղաքական կամք անկախ դատական համակարգ ունենալու համար:

Շատ կարևոր է, որ նախարարը լիարժեք տիրապետի իրավիճակին և արդյունավետ քայլերով իրականացնի այն քաղաքական ուղերձները, որոնք հղվում են կառավարության կողմից»,-ասաց Փաշինյանը:

Նա շնորհակալություն հայտնեց արդեն նախկին նախարար Արտակ Զեյնալյանին՝ նշելով, որ նա Հայաստանում չէ և  դա է պատճառը, որ ներկա չէ այսօր:

Փաշինյանը վստահություն հայտնեց, որ Արտակ Զեյնալյանի ներուժը և  փորձը ՀՀ պետականաշինության գործին ծառայելու հնարավորություն կլինի: