Բաքվում հացադուլ հայտարարած Ռուբեն Վարդանյանի վիճակը կտրուկ վատացել է

 Լեռնային Ղարաբաղի նախկին պետնախարար, գործարար և բարերար Ռուբեն Վարդանյանի վիճակը կտրուկ վատացել է նրա հացադուլ հայտարարելուց գրեթե մեկ շաբաթ անց: Այս մասին ասվում է Վարդանյանի ընտանիքի փաստաբան Ջարեդ Գենսերի հայտարարության մեջ։

Ինչպես նշել է փաստաբանը, մեղադրողները պնդել են, որ Վարդանյանը ներկա է եղել շինծու դատավարությանը, թեև նա գիտակցությունը կորցնելու եզրին էր: Հացադուլի 6 օրվա ընթացքում Վարդանյանը կորցրել է 6 կգ, նրա զարկերակային ճնշումը բարձր է։

«Երեկ Վարդանյանի գործով դատավարությունը շարունակվեց առանց ընդհատումների՝ չնայած նրա առողջական վիճակի վատթարացմանը և հետաձգման բազմաթիվ խնդրանքներին։ Մասնավորապես, Ռուբենի մոտ արձանագրվել է վտանգավոր բարձր արյան ճնշում, որը կազմում է 140/110, որը դասակարգվում է որպես 2-րդ փուլի բարձր արյան ճնշում և համարվում է, որ բժշկական օգնության կարիք ունի: Այս պահին նա նիհարել է 6 կգ-ով։ Նրա զարկերակը նորմայից զգալիորեն բարձր էր։ Նա ուժասպառ էր թվում և մի քանի անգամ մոտ էր գիտակցության կորստին»,- ասվում է հայտարարության մեջ։

Հաշվի առնելով նրա վիճակը ՝ պաշտպանական կողմը միջնորդություն է ներկայացրել դատական նիստը հետաձգելու համար, սակայն դատական կոլեգիան մերժել է միջնորդությունները պնդելով, որ Վարդանյանի համար վտանգավոր չէ մասնակցել նիստին:

Գենսերը նշել է, որ Վարդանյանին իր առողջությանը և անվտանգությանը սպառնացող լուրջ վտանգի պայմաններում այդ դատավարությանը մասնակցելուն հարկադրելը առնվազն դաժան, անմարդկային և արժանապատվությունը նվաստացնող վերաբերմունք կամ պատիժ է:

«Ես կոչ եմ անում միջազգային կազմակերպություններին, որոնք հասանելիություն ունեն ադրբեջանցի բանտարկյալներին, շտապ կարգով պահանջել մուտք գործել Ռուբենի մոտ բանտ։ Բացի այդ, ես խնդրում եմ անկախ դիտորդներին հետևել Ռուբենի դատավարությանը Բաքվում՝ համոզվելու համար, որ նրա իրավունքները չեն խախտվի դատավարության ընթացքում»,- ասվում է փաստաբանի հայտարարության մեջ։

Նա նաև կոչ է արել Ադրբեջանի կառավարությանը թույլ տալ միջազգային թիմի բժշկին այցելել նրան բանտում, որպեսզի անհապաղ տրամադրվի անհրաժեշտ բժշկական օգնությունը, ներառյալ վիճակի կանոնավոր մոնիտորինգը և հետաձգի դատավարությունը մինչև Վարդանյանի հացադուլի ավարտը:

«Ես նաև կոչ եմ անում համաշխարհային առաջնորդներին, հատկապես Հայաստանի վարչապետ Փաշինյանին, դատապարտել Ռուբենի դեմ ցուցադրական դատավարությունը՝ որպես քաղաքականապես մոտիվացված և անօրինական», - ընդգծել Է իրավաբանը: