Նոր իշխանություններից բազմաթիվ խոստումներ ենք լսում․ եթե իրականանան՝ լավ կլինի․ Գաբրիելյան՝ Սիրիայում տիրող իրավիճակի մասին

Ամենատարբեր պատվիրակությունների այցն ու դրա ֆոնին երգող, պարող ժողովուրդ. Սիրիայում կյանքը փուլ առ փուլ վերադառնում է իր նախկին ընթացքին: Սիրիայի խորհրդարանի հայազգի պատգամավոր Մարիա Գաբրիելյանը Yerkir.am-ի հետ զրույցում պատմեց՝ այնտեղ կայնքի անիվը նոր թափ է առնում, իսկ ժողովրդի մի հատվածը հուսադրված ու ոգևորված է:

«Սիրիայի նոր իշխանությունների կողմից բազմաթիվ խոստումներ ու կոչեր ենք լսում։ Եթե դրանք իրականան, ապա լավ կլինի, բոլոր կողմերը գոհ կմնան: Այդ խոստումները, կոչերն ու հավաստիացումները լսելով ժողովուրդը նոր իշխանությունների հետ մեծ հույսեր է կապում»:

Չնայած, որ Սիրիայում ակնհայտ փոփոխություններ դեռևս չկան, բայց Գաբրիելյանի դիտարկմամբ՝ հիմնական զարգացումները քաղաքական դաշտում են իրականանում, ամենատարբեր պատվիրակություններն են այցելում Սիրիա:

«Այս իմաստով փոփոխություններ տեղի են ունենում, որի շնորհիվ էլ իրավիճակը գնալով հանդարտվում է: Թուրքիայի, արաբական երկրների ու Եվրամիության պատվիրակություններն են այցելել մայրաքաղաք: Նաև կարևոր հանդիպումներ ու քննարկումներ են տեղի ունեցել ԱՄՆ-ի պատվիրակության հետ»,- ասաց նա:

Տնտեսական իմաստով ճգնաժամը գնալով հանդարտվում է. ջրի, գազի և մի շարք այլ խնդիրներ իրենց լուծումները ստացել են: Գաբրիելյանը պատմեց՝ փողոցներում արդեն ապահով է, զինյալներն էլ հազվադեպ են երևում:

«Այս իրավիճակը կշարունակվի մինչև մարտի մեկը՝ մինչև անցումային կառավարությունն իր աշխատանքները կավարտի: Առաջիկա օրերին պիտի խորհրդաժողով անցկացվի, որի ընթացքում մի հարկի տակ են հավաքվելու Սիրիայի բոլոր համայնքների ներկայացուցիչները: Այս խորհրդաժողովի ընթացքում նոր հանձնաժողով կընտրվի, որը պիտի «խմբագրի» երկրի Սահմանադրությունը, դրանից հետո, կարծում եմ, փոփոխություններ տեղի կունենան: Սա շատ դրական քայլ է»:

Անդրադառնալով հայ համայնքի ու Սիրիայի նոր իշխանությունների հարաբերություններին, Գաբրիելյանը նկատեց.

«Այժմ հանգիստ իրավիճակ է այստեղ: Առաջին օրերին երաշխավորեցին մարդկանց անվտանգությունը․․․ գիտեք՝ մարդիկ ահ ու սարսափի մեջ էին ապրում: Ինչպես նախկինում, այնպես էլ հիմա՝ կյանքը շարունակվում է նախկինի նման, եկեղեցիները բաց են, շարունակում են իրենց աշխատանքները»,- ասաց Գաբրիելյանն ու հավելեց՝ այն հայերը, որոնք ժամանակավորապես տեղափոխվել են Հայաստան, շատ չեն:

«Սիրիահայ համայնքը վերադառնում է իր բնականոն կյանքին․ դպրոցները վերսկսել են իրենց աշխատանքը, աշակերտները բնականոն կերպով հաճախում են դպրոցներ: Մանկապարտեզները ևս աշխատում են, խանութներից մինչև աշխատավայրեր բաց են»:

Հիշեցնենք, որ ավելի վաղ Հայաստանի Հանրապետության արտաքին գործերի նախարարության մամուլի քարտուղար Անի Բադալյանը հայտնել էր, որ Հալեպում ՀՀ գլխավոր հյուպատոսությունը դեկտեմբերի 19-ից կվերսկսի իր աշխատանքները:

Սիլվի Մուրադյան