Վնասը շատ մեծ կլինի. Գյուլը՝ երկրում տիրող իրավիճակի մասին

Թուրքիայի նախկին նախագահ Աբդուլլահ Գյուլը պատասխանել է իրեն ուղղված քննադատություններին, թե Անկարայում տեղի ունեցած պայթյուններից հետո ինչո՞ւ է ցավակցել քրդամետ Ժողովուրդների դեմոկրատական կուսակցության ղեկավար Սելահաթթին Դմեիրթաշին:

Ըստ Siyasihaber-ի՝ Գյուլն իր զարմանքն է հայտնել այդ կապակցությամբ և ասել, որ այնպիսի վիճակ է ստեղծվել երկրում, որ մարդիկ քննարկում են մեկին ցավակցել-չցավակցելու հարցը: «Այնպիսի միջավայր է ստեղծվել, որ տարօրինակ են ընկալում մեկին ցավակցելու երևույթը: Այս մթնոլորտում ինչպե՞ս եք միասին ապրելու, ինչպե՞ս են մարդիկ տևական ժամանակ համատեղ ապրելու»,- ասել է նա:

Նախկին նախագահի խոսքով՝ բոլորն անընդհատ լարված են: «Կասկած չկա, որ այսքան վրդովմունքը այսքան լարվածությունը և բոլորի՝ անընդհատ լարված լինելը խաղաղություն չի բերի: Նման բան հնարավոր է կարճ ժամանակով, սակայն նման իրավիճակները եթե երկար շարունակվեն, մեծ վնասներ կլինեն»,- նշել է Գյուլը: