Վճարման համակարգերի պատճառով ընմիջումներին ավտոբուսներն անջատո՞ւմ են շարժիչը, թե՞ ոչ

Օրեր առաջ ավտոբուսի վարորդների բողոքի ակցիայի ժամանակ վարորդներն ասացին, որ ավտոբուսներն ուղևորափոխադրումներ չիրականացնելու ժամանակահատվածում չեն անջատում շարժիչները, որ ավտոբուսներում տեղադրված վճարման համակարգերը (վալիդատորները) չանջատվեն։

Yerkir.am-ը քաղաքապետարանին խնդրել էր պատասխանել հետևյալ հարցին. քանի՞ լիտր դիզվառելիք է ծախսվում ավտոբուսների վալիդատորների անխափան աշխատանքի համար: Քաղաքապետարանից, ժողովրդական լեզվով ասված, ցրել են հարցը՝ պատասխանելով, որ միասնական տոմսային համակարգի ներդրման պատասխանատու անձանց կողմից նման պաշտոնական հայտարարություն չի արվել:

Դիմել ենք նորից՝ ասելով, պարո՛ն Ավինյան, մենք չէինք հարցրել՝ ո՞վ է հայտարարել, մենք խնդիր էինք բարձրաձայնել, որը կարելի էր չշրջանցել և պարզաբանել՝ կա՛մ անջատվում են, և սխալ է նման բան հայտարարելը, կա՛մ՝ այո՛, ավտոբուսներն ուղևորափոխադրումներ չիրականացնելու ժամանակահատվածում չեն անջատում շարժիչները, որ ավտոբուսներում տեղադրված վճարման համակարգերը (վալիդատորները) չանջատվեն, որի համար ծախսվում է հավելյալ էսքան տոննա վառելիք: Տարրական բան, որը հասկանալու համար անգամ դպրոց պետք չի գնալ:

Հարցի վերաբերյալ պարզաբանումն ստանալուն պես այս մասին կտեղեկացնենք հանրությանը: