«Ագրարային ակադեմիա» կամ ինչո՞ւ Ժաննան չի հուզվում ու դասեր տալիս իրավանախորդին

«Քանի տարի է Գյուղինստիտուտ ուսանող չի մտնում. ի՞նչ եք մտածում Գյուղինստիտուտի գրավչությունը բարձրացնելու համար», - ԱԺ-ում ընթացող՝ 2025 թվականի բյուջեի նախագծի քննարկման ժամանակ ԿԳՄՍ նախարարից հետաքրքրվեց «Հայաստան» խմբակցության պատգամավոր Արթուր Խաչատրյանը։

Ի պատասխան՝ Ժաննա Անդրեասյանը հիշեցրեց, որ բուհն ունի այլ անվանում՝ Ագրարային համալսարան, սակայն այդպես էլ բովանդակային պատասխան չտվեց, թե պետական մակարդակով ինչ է արվելու Ագրարային համալսարանի գրավչությունը բարձրացնելու համար։

Այդպիսով, շրջանցելով հարցի բովանդակային կողմը, Ժաննա Անդրեասյանը փորձեց  նախատել և դասեր տալ Ազգային ժողովի պատգամավորին. «Մենք գյուղինստիտուտ ուղղակի չունենք, մենք ունենք Հայսատանի ազգային ագրարային համալսարան և վստահ եմ, որ նաև վերաբերմունքը, որ մենք դրսևորում ենք շարունակաբար, տարիներ շարունակ մեր բուհերը կոչելով այլ անուններով, որևէ կերպ չի նպաստում այդ բուհերի հանդեպ հանրային ուշադրության, կրթության գրավչության բարձրացմանը»:

Yerkir.am-ը ներկայացնում է երեկվա կառավարության նիստի տեսանյութը, որում ԿԳՄՍ նախկին նախարար Արայիկ Հարությունյանն Ագրարային համալսարանի մասին խոսելիս (նայել 2,35 րոպեից) օգտագործում է «ագրարային ակադեմիա» տերմինը:

Տիկի՛ն Ժաննա, բա ինչո՞ւ ես լուռ։ Ինչո՞ւ չես հուզվում ու դասեր տալիս իրավանախորդիդ։