Պատկերացնո՞ւմ եք` մարդ, ով նայում է դրոշին և հուզվում. Ջիվան Ավետիսյանն` իր ապրածի մասին

Ջիվան Ավետիսյանի «Թևանիկ» ֆիլմն ընդգրկված է «Ոսկե ծիրան» կինոփառատոնի «Հայկական համայնապատկեր» անվանակարգում:

Կինոռեժիսորը լրագրողների հետ հանդիպման ժամանակ նշեց, որ ֆիլմը պատմում է Արցախյան հերոսամարտի մասին, դեպքերն ընթանում են մեկ գյուղում ու միաժամանակ:

«Ֆիլմը երեք պատանիների մասին է: Անկախ նրանից, թե որտեղ ես ապրում, պատերազմի հետևանքները կրում ես քեզ վրա, քանի որ պատերազմի շունչն օդում է: Ֆիլմի ավարտն էլ խորհրդանշում է չավարտված պատերազմը` հիմա էլ դեռ կրակում են: Ես ապրել եմ այդ տարիները, իմ մանկությունն անցել է գորշ գույներով, դրա համար էլ ես ինձ իրավունք եմ վերապահել պատմել դրա մասին»,-ասաց Ավետիսյան` հավելելով, որ ցանկացել է, որ հանդիսատեսը հասկան` մինչ օրս կրում ենք պատերազմի հետևանքը` անկախ նրանից` ապրում ենք Փարիզում, թե` Երևանում:

Կինոռեժիսորի հավաստմամբ`   ֆիլմն իրականում խաղաղության մասին է. «Ես պատմում եմ պատերազմի մասին, բայց քարոզում խաղաղություն: Ինձ համար կարևոր է նկարահանել ազնիվ կինո: Ես անցել եմ այդ ամենի միջով, պատկերացնո՞ւմ եք` մարդ, ով նայում է դրոշին և հուզվում»:

Ավետիսյանը տեղեկացրեց նաև, որ նախատեսում է նոր ֆիլմ նկարահանե` կրկին Ղարաբաղի մասին /«Վերջին բնակիչը»/: