Հռոմի պապը առաքելական այցով ժամանել է Սինգապուր

Հռոմի Ֆրանցիսկոս պապը Հարավարևելյան Ասիա և Օվկիանիա կատարած իր 45-րդ արտասահմանյան առաքելական ուղևորության շրջանակում ժամանել է Սինգապուր: Դրա մասին հայտնել է The Straits Times պարբերականը՝ YouTube ալիքին կից հեռարձակմամբ։

Հռոմի պապը մտադիր է սեպտեմբերի 11-ին հանդիպել ճիզվիտների միաբանության անդամների հետ, իսկ սեպտեմբերի 12-ին Սինգապուրի նախագահ Թարման Շանմուգարաթնամի և վարչապետ Լոուրենս Վոնի հետ:

Ֆրանցիսկոսը պատմության մեջ Սինգապուր այցելած Հռոմի կաթոլիկ եկեղեցու երկրորդ առաջնորդն է, (1986 թվականին առաջինը եղել է Հովհաննես Պողոս Երկրորդը):

Սուրբ Աթոռի մամուլի ծառայության ղեկավարը ապրիլի 12-ին հայտարարել է, որ Հռոմի պապը սեպտեմբերի սկզբին ուղևորություն կկատարի ասիական երկրներ, հավելելով, որ առաքելական ուղևորությունը կտևի սեպտեմբերի 2-13-ը։ Ավելի վաղ քահանայապետն այցելել էր Ինդոնեզիա, Պապուա Նոր Գվինեա և Արևելյան Թիմոր։