Չի կարելի իրավական փնթիությամբ բերել նախագիծ և փորձել, իբրև, կարգավորել մշակութային դաշտը․ Լիլիթ Գալստյան

ԱԺում այսօր քննարկվում էր «Մշակութային օրենսդրության հիմունքների մասին» ՀՀ օրենքում  լրացումներ և փոփոխություններ կատարելու մասին կառավարության ներկայացրած նախագիծը։

նախագծով առաջարկվում է «պետական» անվանումը շնորհել միայն այն կազմակերպություններին, որոնք ունեն համապետական նշանակություն: Նախագծի ներկայացումից հետո ԱԺ «Հայաստան» խմբակցության պատգամավոր Լիլիթ Գալստյանն ասաց, որ կառավարության կողմից  ներկայացված «Մշակութային օրենսդրության հիմունքների մասին» օրենքում լրացումներ և փոփոխություններ կատարելու մասին օրենքի նախագիծն ընդհանրապես ԱԺ ամբոնին հասնելու իրավունք չուներ։  Ըստ նրա՝ նախագիծը լեցուն է իրավական  անճշտություններով, հակասություններով։ 

«Կատարյալ  խառնաշփոթ և իրավական նոնսենսի է ենթարկվել մշակութային  կազմակեպությունների կարգավիճակը վերնագրով հոդվածը, ուր առաջարկվում է  «ազգային»  բառը փոխարինել «պետականով»։ Անտրամաբանական է այն փաստարկը, թե ազգայինը հանվում է պետականության բառերի ավելի արժևորման, նրա գործածումը կանոնակարգելու նպատակով։ Սրանք սոսկ բառեր չեն, հասկացություններ են, դրանց  հակադրությունը պարզապես կեղծ է և մտացածին,  ճիշտ այնպես, ինչպես հակադրվում է վերջին շրջանում պետությունն ու հայրենիքը»,- ասաց Լիլիթ Գալստյանը։

Պատգամավորն առաջարկեց հետաձգել նախագծի ընդունումը և այն  քննարկել  շահառու կազմակերպությունների, ինքնազբաղների,  «ազգային» կարգավիճակ ունեցող կազմակերպությունների, մշակութային դաշտի այլ շահառուների  հետ:

«Չի կարելի այս խակությամբ և իրավական փնթիությամբ նախագիծ բերել և փորձել հավակնություն ունենալ, թե մենք կարգավորելու ենք մշակությին դաշտը»,- ասաց ընդդիմադիր պատգամավորը։

Մանրամասն՝ տեսանյությում։