Լրագրողները խնդրել են կարգավորել դաշտը. խորհրդարանական լսումներ` ԱԺ-ում

ԱԺ-ում «Վիրավորանքը և զրպարտանքը ԶԼՄ-ներում» թեմայով լսումներ են ընթանում:

ՀՀ քաղաքացիական օրենսգրքում լրացումներ կատարելու մասին օրենքի նախագծի հեղինակ Արփինե Հովհաննիսյանը մանրամասնեց, որ եթե վիրավորելիս հղում չկա տեղեկատվության աղբյուրին, կամ այն հայտնի չէ, ապա վիրավորանքի կամ զրպարտանքի պատասխանատվությունը կրում է լրատվական գործունեություն իրականացնողը:

«Եթե քաղաքացի Սարիբեկ Կիրակոսյանը Արփինե Հովհաննիսյանի հասցեին արեց վիրավորական կամ զրպարտող մեկնաբանություն, ո՞ւմ դեմ պետք է հայց ներկայացնի Արփինե Հովհաննիսյանը՝ իր իրավունքների պաշտպանությունը իրականացնելու համար»,- շահագրգիռ կողմերին հարց ուղղեց Արփինե Հովհաննիսյանը:

ԱԺ ԲՀԿ խմբակցության քարտուղար Նաիրա Զոհրաբյանը, ով օրենքի համահեղինակներից է, նշեց, որ նախաձեռնությունը պատկանում է լրատվամիջոցներին: Նա նշեց, որ իրենց դիմել են մի խումբ փորձառու լրագրողներ, որոնք խնդրել են կարգավորել այդ դաշտը:

«Անմիտ է ընդունել այս օրինագիծը` որպես ԶԼՄ-ների դեմ ուղղված քայլ: Այս խնդրի կարգավորման իմպուլսը եկել է հենց լրատվամիջոցներից»,- ասաց Նաիրա Զոհրաբյանը: