«Շիրվանյան» երիտասարդական կենտրոնը նշել է իր հիմնադրման 8-րդ տարեդարձը

ՀՅԴ Արևմտյան Ամերիկայի կենտրոնական կոմիտեի ստեղծած «Մենք ենք Գյումրին» հանձնախումբը տեղեկացնում է, որ հուլիսի 11-ին նշվել է Գյումրու «Շիրվանյան» երիտասարդական կենտրոնի հիմնադրման 8-րդ տարեդարձը։

Կենտրոնի վարիչն է Սյուզաննա Խոստանյանը: Տոնակատարության ընթացքում ելույթ ունեցողները ուշադրության արժանացրին կենտրոնի ձեռնարկները և ապագա քայլերը։

«Շիրվանյան» երիտասարդական կենտրոնը սկսել է գործել հանգուցյալ տեր և տիկին  Հակոբ և Մինա Շիրվանյանների աջակցության շնորհիվ, 1988 թ. երկրաշարժից վնասված այդ կառույցի մեջ իրականացված շինարարական աշխատանքներն ամբողջացնելուց հետո։ Այդ թվականից ի վեր, «Մենք ենք Գյումրին» հանձնախումբը կենտրոնը վերածել է այդ շրջանի պատանիների և երիտասարդների համար աշխույժ գործունեության վայրի՝ կազմակերպելով անգլերենի, ռուսերենի, համակարգչային գիտելիքների, երաժշտության, շախմատի և պարի դասընթացքներ։ Այն դարձել է մշակութային, կրթական և ընկերային վայր՝ նպաստելով Հայաստան-Սփյուռք հարաբերությունների սերտացմանը:

Կենտրոնի հաջողության կարևոր մասնիկը հանդիսանում է Մինա Շիրվանյանի անվան կրթանպաստների հիմնադրամը, որն հնարավորություն է տալիս Գյումրու երիտասարդներին՝ իրենց բարձրագույն ուսումը շարունակելու հայրենիքում, որպեսզի նրանք ապագայում գործնական մասնակցություն ունենան Գյումրու վերականգնման աշխատանքներին: Կրթանպաստ ստացող ուսանողները սովորաբար կամավոր սպասարկություններ են մատուցում «Շիրվանյան» երիտասարդական կենտրոնին:

Տոնակատարությանը զուգահեռ, կենտրոնը նաև հուլիսի 16-ից օգոստոսի 10-ը հյուրընկալում է ավանդական դարձած ամառային ճամբարներ 6-ից 16 տարեկան պատանիների համար, որն այս տարի կրում է «Ամարաս» ընդհանուր խորագիրը։

Այս առիթով, «Մենք ենք Գյումրին» հանձնախումբը համայնքին կոչ է անում աջակցելու իր գործունեությանը, նվիրատվություններ կատարելով կայքի միջոցով։ Հավելյալ տեղեկությունների համար կարող եք այցելել կայքէջ։