Ագրարայինի ղեկավարության եկամուտների մասին տեղեկատվությանը խորհրդի նախագահը չի տիրապետում

Yerkir.am-ը տեղեկացրել էր, որ Հայաստանի ազգային ագրարային համալսարանը 2021 թվականից կուտակել է շուրջ 350 միլիոն դրամ պարտք գույքահարկի գծով:

Հայաստանի ազգային ագրարային համալսարանի ռեկտորը 2018-2023թթ. Վարդան Ուռուտյանն էր, իսկ 2023թ. դեկտեբերի 25-ից ռեկտորի պարտականությունները կատարում է ուսումնական աշխատանքերի գծով պրոռեկտոր Հրաչյա Զաքոյանը:

Yerkir.am-ը հարցում էր ուղարկել համալսարանի հոգաբարձուների խորհրդի նախագահ, էկոնոմիկայի նախարարի տեղակալ Արման Խոջոյանին հետևալ բովանդակությամբ.

«2023 թվականի ընթացքում համալսարանի ղեկավար 16 անձինք որքա՞ն եկամուտ (աշխատավարձ և դրան հավասարեցված այլ վճարումներ, ներառյալ հիմնական աշխատավարձ, լրացուցրիչ վարձատրություն, հավելավճար, լրավճար, հավելում, պարգևատրում և այլն, ինչպես նաև ՀՀ Քաղաքացիական օրենսգրքի համաձայն մատուցված ծառայությունների դիմաց քաղաքացիաիրավական պայմանագրերի շրջանակներում ստացված վճարումներ) են ստացել համալսարանում:

Խոսքը ներքոհիշյալ 16 անձանց մասին էր՝

1. Հրաչյա Զաքոյան - պրոռեկտոր

2. Հրաչյա Ծպնեցյան - պրոռեկտոր

3. Արամ Հովհաննիսյան - պրոռեկտոր

4. Մարիամ Մովսիսյան - պրոռեկտոր

5. Լուսինե Մնացականյան – աշխատակազմի ղեկավար

6. Մարիամ Պողոսյան – գլխավոր հաշվապահ

7. Միսակ Ղարագյոզյան - մարքեթինգի և զարգացման բաժնի նախկին պետ

8. Սոս Ավետիսյան - լրատվության և հասարակայնության բաժնի պետ

9. Աղավարդ Խաչատրյան – հոգաբարձուների խորհրդի անդամ

10. Վիկտոր Աբրահամյան – հոգաբարձուների խորհրդի անդամ

11. Նունե Սիմոնյան – հոգաբարձուների խորհրդի անդամ

12. Սերյոժա Երիցյան – հոգաբարձուների խորհրդի անդամ

13. Գուրգեն Եղիազարյան – հոգաբարձուների խորհրդի անդամ

14. Մանվել Վարդանյան – իրավաբանական բաժնի պետ

15. Թոռնիկ Ալիյան– հոգաբարձուների խորհրդի անդամ 1

6. Վարդան Ուռուտյան – նախկին ռեկտոր»:

Խոջոյանը պատասխանել է, որ համալսարանի առանձին աշխատակիցների տարեկան եկամուտների վերաբերյալ տեղեկատվություն հոգաբարձուների խորհրդի անդամների տրամադրության տակ առկա չէ:

Խոջոյանի պատասխանը պարունակում երեք հետաքրքիր դրվագ: Նախ. Yerkir.am-ի հարցման մեջ նշված անձինք ոչ թե միայն համալսարանի առանձին աշխատակիցներին են, այլ համալսարանի ղեկավարությունը: Երկրորդ, մենք ակնկալում եինք ստանալ տեղեկատվություն ոչ թե նշված անձանց տարեկան եկամուտների, այլ համալսարանում ստացած եկամուտների վերաբերյալ: Եվ վերջապես երրորդ, հարցումը ստանալու պահին գուցե հոգաբարձուների խորհրդի տրամադրության տակ տվյալներ չեն եղել, սակայն համապատասխան ցանկության դեպքում այդ տեղեկատվությունը ռեկտորի պարտականությունները կատարողից ստանալը կխլեր ընդամենը մի քանի րոպե: Ամփոփելով, կարող ենք արձանագրել, որ հոգաբարձուների խորհրդի նախագահը ընդամենը չի ցանկացել, որ հասարակությունը, այդ թվում համալսարանի աշխատակիցներն և ուսման վարձավճար վճարող ուսանողները տեղեկանան համալսարանի ղեկավարության համալսարանում ստացած եկամուտների մասին: Այդ ժամանակ թերևս կպարզվեր, թե ինչու համալսարանը 2021 թվականից չի վճարել գույքահարկը և տույժերը ու կուտակել է շուրջ 350 միլիոն դրամ պարտք: