կարևոր
2095 դիտում, 4 շաբաթ առաջ - 2024-05-24 14:46
Հասարակություն

Առաջին քայլը Դիարբեքիրի Սուրբ Սարգիս եկեղեցու վերականգնման ուղղությամբ

Առաջին քայլը Դիարբեքիրի Սուրբ Սարգիս եկեղեցու վերականգնման ուղղությամբ

Դիարբեքիրում տարիներ շարունակ ավերակ վիճակում գտնված Սուրբ Սարգիս հայկական եկեղեցու վերականգնման նպատակով առաջին քայլը նախատեսվում է անել հունիսի 13-ին։ Վերանորոգման աշխատանքները մեկնարկելու են Թուրքիայի Մշակույթի և զբոսաշրջության նախարարության հատկացրած գումարներով, բայց և այնպես հավելյալ ֆինանսավորման աղբյուր գտնելու անհրաժեշտություն կա։

Այդ մասին, Akunq.net-ի փոխանցմամբ, հաղորդում է «Ակօս» հայկական շաբաթաթերթի թուրքալեզու կայքէջը։

Աղբյուրի համաձայն՝ Սուրբ Սարգիսը, ինչպես և Սուրբ Կիրակոս եկեղեցին գտնվում է Դիարբեքիրի Սուր շրջանում։ Սուրբ Սարգիս եկեղեցին բավականին վնասներ է կրել անցյալ տարվա փետրվարի 6-ի երկրաշարժից։

Սուրբ Սարգիս եկեղեցու վերականգնման համար անհրաժեշտ ֆինանսավորում գտնելու նպատակով երկար ժամանակ աշխատանքներ է իրականացրել Դիարբեքիրի Սուրբ Կիրակոս եկեղեցու հիմնադրամը։

Նախատեսվում է, որ եկեղեցու վերանորոգումից բացի, կկառուցվեն նաև կից կառույցներ, օրինակ՝ ժողովասրահներ, ցուցասրահներ և այլն։

Դիարբեքիրի Սուրբ Սարգսի վերանորոգման համար Թուրքիայի Մշակույթի և զբոսաշրջության նախարարությունը հատկացրել է 5 միլիոն թուրքական լիրա (մոտավորապես՝  155․000 ԱՄՆ դոլար)։

Սուրբ Կիրակոս եկեղեցու հիմնադրամի ղեկավարությունը՝ Էրգյուն Այըքի գլխավորությամբ, ժամանել է Ստամբուլ, հանդիպել Կ․Պոլսո Հայոց պատրիարք Սահակ Մաշալյանին և վերջինիս տեղեկություններ հաղորդել այդ աշխատանքների վերաբերյալ։

Կ․Պոլսո Հայոց պատրիարքը նոր զարգացումների կապակցությամբ իր գոհունակությունն արտահայտելով՝ շնորհավորել է հիմնադրամին և խոստացել աջակցություն ցուցաբերել այդ գործին։ Նախատեսվում է, որ վերականգնողական աշխատանքները հանդիսավոր կերպով կսկսվեն հունիսի 13-ին, Կ․Պոլսո Հայոց պատրիարքի մասնակցությամբ։

«Ակօս»-ի տեղեկություններով՝ սույն նախագիծն ավարտին հասցնելու համար ընդհանուր առմամբ անհրաժեշտ է շուրջ 60 միլիոն թուրքական լիրա (մոտավորապես՝ 1․860․307 ԱՄՆ դոլար)։ Հիմնադրամը և հայկական համայնքը շարունակում են աշխատանքները այդ գումարը հայթայթելու ուղղությամբ։

https://www.agos.com.tr/tr/yazi/30353/surp-sarkis-kilisesi-nin-yenilenmesi-icin-ilk-adim-atiliyor

Թարգմանեց Մելինե Անումյանը

Akunq.net