450 000 դոլար` Մեղրիի Սուրբ Սարգիս եկեղեցու վերականգնման համար

Մեղրիի Սուրբ Սարգիս եկեղեցու պահպանության ու վերականգնման համար ԱՄՆ դեսպանի մշակութային արժեքների պահպանության հիմնադրամը կհատկացնի 450 000 դոլար:

Այսօր` լրագրողների հետ հանդիպման ժամանակ, ԱՄՆ դեսպան Ռիչարդ Միլսը նշեց, որ եկեղեցին մի անգին գանձ է, որտեղ կան պահպանված նաև որմնանկարներ, որոնցում զուգակցված են ուշ միջնադարյան քրիստոնեության պատկերագրության տարրեր:

«Սա ոչ միայն Հայաստանի հարստությունն է, այլև` աշխարհինը, դրա համար էլ պետք է չխնայենք ոչինչ` այն վերականգնելու համար: Բացի այդ` մշակույթի պահպանումն օգնում է ավելի լավ ճանաչել ինքներս մեզ: Եկեղեցու և որմնանկարների վերականգնումը, ի դեպ, կնպաստի նաև տեղում մշակութային տուրիզմի զարգացմանը»,- ասաց դեսպանը:

 ՀՀ մշակույթի նախարարի պաշտոնակատար Հասմիկ Պողոսյանն էլ նշեց, որ եկեղեցին ինքնատիպ ճարտարապետական կառույց է, որի արժեքը գիտակցել են դեռևս 80-ականներին և փորձել վերականգնել այն, սակայն ֆինանսական խնդիրների պատճառով աշխատանքները կիսատ են մնացել:

«Եկեղեցին 17-րդ դարի կառույց է` յուրահատուկ որմնանկարներով, որոնք արված են Հովնաթանյան դպրոցի ներկայացուցիչների կողմից: Այս որմնանկարները, ի տարբերություն մի շարք այլ հուշարձաններում պահպանված որմնանկարների, իրենց կատարման տեխնիկայով, թեմատիկ ուղղվածությամբ ամբողջական են: Եկեղեցու վերականգնման աշխատանքները կսկսվեն այս տարի, և հույս ունենք, որ ավարտին կհասցնենք մինչև 2018-ի տարեվերջը»,- ասաց Պողոսյանը: