Միջադեպ` Սուրբ Սարգիս եկեղեցու մոտ (լուսանկարներ)

Քիչ առաջ Մարդու իրավունքների պաշտպանի «թեժ գիծը» ահազանգ է ստացվել, որ  Սուրբ Սարգիս եկեղեցու առջեւ տեղի է ունեցել միջադեպ. «Արարատ» երիտասարդաց  միության անդամները, Վահրամ բարեշնորհ սարկավագ Կարապետյանի մասնակցությամբ, փորձել են Արարատյան Հայրապետական թեմի առաջնորդարանի առջեւ ակցիա կազմակերպել` ի պաշտպանություն տեր Հակոբ քահանա Խաչատրյանի, սակայն խոչընդոտվել է ներկաների՝ խաղաղ հավաք անցկացնելու իրավունքը:

ՄԻՊ-ի գրասենյակից հայտնում են, որ ՄԻՊ աշխատակազմի արագ արձագանքման բաժնի աշխատակիցները շտապ մեկնել են դեպքի վայր: Վահրամ սարկավագը աշխատակիցներին հայտնել  է, որ  իրենք փորձել են բարձրախոսներ տեղադրել, սակայն Արարատյան թեմի աշխատակազմի ղեկավար Հայկ Թադևոսյանը վիճաբանության մեջ է մտել իր հետ, քաշքշել  ու  պատռել  է իր հագուստը:

Վահրամ սարկավագի խոսքերով` իրենք դիմել են տեղում գտնվող ոստիկաններին, սական նրանց կողմից միջոցներ չեն ձեռնարկվել:  

Այս ամենի կապակցությամբ Վահրամ սարկավագը  դիմում է  ներկայացրել ՄԻ պաշտպանին, որը հրատապ կերպով ընդունվել է վարույթ: Պաշտպանի արձագանքը կլինի առաջիկա օրերին: