Պուտինն Ուկրաինայի էներգաօբյեկտներին հասցված հարվածները ՌԱՀ-ի վրա ազդեցություն է անվանել

ՌԴ նախագահ Վլադիմիր Պուտինն ուկրաինական էներգաօբյեկտներին Ռուսաստանի հարվածներն անվանել է ապառազմականացում և Ուկրաինայի պաշտպանական-արդյունաբերական համալիրի վրա ուղղակի ազդեցություն: Այս մասին նա հայտարարել է Բելառուսի նախագահ Ալեքսանդր Լուկաշենկոյի հետ հանդիպման ժամանակ։

«Եթե ամեն ինչ հանգում է այն հարցերի լուծմանը, որոնց մասին մենք ի սկզբանե խոսում ենք, և էներգետիկային հարվածները կապված են նաև այն խնդիրներից մեկի լուծման հետ, որը մենք մեր առջև դրել ենք, իսկ դա ապառազմականացումն է, ինչն առաջին հերթին ելնում է նրանից, որ մենք այդ կերպ ազդում ենք Ուկրաինայի ռազմարդյունաբերական համալիրի վրա, ընդ որում՝ ուղղակիորեն»,-ասել է նա:

Պուտինն ընդգծել է նաև, որ Ռուսաստանը ձմռանը ձեռնպահ է մնացել Ուկրաինայի էներգետիկ օբյեկտներին հարվածելուց, սակայն ստիպված է եղել պատասխանել Կիևի հարվածներին ՌԴ էներգետիկ օբյեկտներին:

«Մենք վերջին շրջանում մեր էներգաօբյեկտներին մի շարք հարվածներ ենք տեսել և ստիպված ենք եղել պատասխանել։ Ես ուզում եմ ընդգծել, որ մենք նույնիսկ, ելնելով մարդասիրական նկատառումներից, ձմռանը ոչ մի հարված չենք հասցրել, նկատի ունեմ, որ չենք ցանկացել առանց էներգամատակարարման թողնել սոցիալական հաստատությունները, հիվանդանոցները և այլն»,- ասել է Ռուսաստանի ղեկավարը։

Պուտինը նաև հայտարարել է, որ Ռուսաստանի ագրեսիվ քաղաքականության մասին Արևմուտքի հայտարարությունները անհեթեթություն են: Դրանք ուղղված են նրան, որպեսզի արդարացնեն իրենց ծախսերն Ուկրաինայի հակամարտության մեջ։