Այս իշխանությունները հանրությանը կոչ են անում հարմարվել թշնամու առաջ ծնկի գալու իրենց քաղաքականությանը. պատգամավոր

Օրվա իշխանությունները հանրային կյանքի տարբեր ոլորտներում վարում են այնպիսի քաղաքականություն, որը տանում է մեր երկրի ինքնիշխանության թուլացման: Եվ դա արվում է նաև հեռահար ազդեցություն ապահովող ծրագրերով, որպեսզի ոչ միայն մենք, դուք այսօր չպայքարենք այդ ամենի դեմ, այլ նաև մեր վաղվա սերունդը, երիտասարդ սերունդը չպայքարի դրա դեմ:

Փորձեմ  ներկայացնել ասածիս հիմնավորումը կրթության ոլորտի համատեքստում:

Հանրությանը ներկայացվեց «Ուսուցիչների աշխատավարձերի բարձրացման նպատակով կազմակերպվող ատեստավորման գործընթաց» գեղեցիկ ձևակերպմամբ փաթեթավորված մի ծրագիր, որի արդյունքում իրականում դպրոցից ազատվում են բազմամյա մանկավարժական փորձ ունեցող, իրենց մասնագիտությանը տիրապետող շատ ուսուցիչներ:

Ինչու՞, նախ որովհետև ատեստավորման թեստերի համար տրվող ժամանակը և բովանդակությունը անհամատեղելի են: Մյուս կողմից արդյոք արագ խնդիր լուծելը բավարար է լավ մանկավարժ լինելու համար: Լավ մանկավարժը պետք է ունենա անհրաժեշտ գիտելիքները աշակերտին հաղորդելու հմտություն, սեր առաջացնի աշակերտի մոտ առարկայի ու ընդհանրապես կրթության նկատմամբ:

Հայտարարվեց, թե ունենք բազմաթիվ ուսուցիչներ, ովքեր ատեստավորման արդյունքում կստանան 400.000-ի կարգի աշխատավարձ:

Իրականում 29.000 ուսուցչից ատեստավորմանը 3 տարվա ընթացքում մասնակցել են մոտ 6500-ը, որոնցից մոտ 1000-ը չեն ատեստավորվել, նրանցից մոտ 1,7 %-ին է հաջողվել ստանալ 90-100 միավոր և հավակնել նման աշխատավարձի:

Մոտ 10% կունենա 200.000 կարգի աշխատավարձ, իսկ մնացած 23000-ի մոտ ավելացավ սթրեսը և ցածր աշխատավարձ ունենալու հետ հարմարվելով՝ թուլացավ լավ կյանքի որակի համար պայքարելու կամքը:

Գյուղերում բավարարվում են ուսուցիչների թափուր տեղերը ուսանողներով համալրելով:

Սա է՞ աշակերտին ավելի բարձր որակի կրթություն ապահովելու իրենց ծրագիրը:

Սիրելի հայրենակից, այս իշխանությունները վտանգում են մեր երկրի այսօրը՝ հանրությանը կոչ անելով հարմարվել թշնամու առաջ ծնկի գալու իրենց քաղաքականությանը:

Նրանք վտանգում են մեր երկրի ապագան՝ մեր երեխաներին զրկելով որակյալ, ազգային կրթություն ստանալու հնարավորությունից:

Չի կարելի այդ ամենը հանդուրժել:

Դեռ ուշ չէ, ոտքի կանգնենք և հեռացնենք այս ուժին իշխանությունից:

Իրենք դրա համար արդեն ամեն ինչ արել են:

Հերթը մերն է:

Մեր միասնությունը կփրկի երկիրը:

Սիրելի հայրենակից,

Միացիր այս իշխանություններին հեռացնելու պայքարին:

Արմենուհի Կյուրեղյան

ՀՀ ԱԺ «Հայաստան» խմբակցության պատգամավոր