Սահմանապահ համայնքների մեր հայրենակիցները չեն կարողանում օգտվել միակ պետական աջակցությունից․ Արման Ղազարյան

«Հայաստան» խմբակցության պատգամավոր Արման Ղազարյանի ելույթը՝ ԱԺ հայտարարության ժամաին

«Հարգելի հայրենակիցներ

Գեղարքունիքի մարզ հերթական այցելության ընթացքում ևս մեկ անգամ պարզ է դառնում, որ մեր հայրենակիցների կողմից բարձրացվող գյուղատնտեսական խնդիրները շարունակում են մնալ չլուծված։ Ավելին եղածին արդեն ավելացել են նոր խնդիրներ ու անորոշություններ։

Այդպես էլ կառավարությունը գործուն միջոցներ չձեռնարկեծ գյուղմթերքի իրացման խնդիրները լուծելու համար։ Հետևանքն արդեն արձանագրված է՝ հազարավոր տոննաների չիրացված կաղամբի և կարտոֆիլի բերքը նեխում է գյուղացու պահեստներում։ Բերքի որոշ մասն էլ իրացվել է ինքնարժեքից գրեթե 30-40 տոկոսով պակաս գնով։

Իսկ հիմա արդեն մեկնարկում են գարնանային գյուղատնտեսական աշխատանքները և գյուղացին նորից մենակ է իր խնդիրների առջև։

Փաստորեն գյուղացին պարտքով և ֆինանսական էական կորուստներով սկսելու է գյուղատնտեսական աշխատանքների այս տարվա մեկնարկը։

Մասնավորապես,կառավարության որոշմամբ հաստատվել է գյուղատնտեսական որոշ մշակաբույսերի, այդ թվում՝ հացահատիկ, գարի, առվույտ, կորնգան, մշակման համար պետական աջակցության ծրագիրը։ Ըստ այս ծրագրի պարտադիր բաղադրիչ է հավատարմագրված սերմացու օգտագործման պահանջը։ Օրինակ՝ ցորենի հավատարմագրված սերմացուի 1 կգ-ի արժեքը 190-200 ՀՀ դրամ է, որի որակի առումով որևէ երաշխիք չկա։ Շատ դեպքերում ցանվում է գարնանացան ցորեն, որը հետո պարզվում է աշնանացան է։ Իսկ տեղական և առավել որակյալ տեղական սերմացուի 1 կգ-ի գինը 70-80 դրամ է, սակայն չի կարող օգտագործվել նշված ծրագրի շրջանակներում։

Փաստորեն այս ծրագրով սուբսիդավորումն ամբողջությամբ ուղղվում է դրսից ներկրված սերմացուի և տեղական սերմացուի գների տարբերության ծախսի վրա։ Այսինքն՝ գյուղացին, ըստ էության, ոչ մի առարկայական օգուտ չի ստանում՝ այս ծրագրի շահառու դառնալով։

Հետևանքը՝ սահմանապահ համայնքների մեր հայրենակիցները այս ծրագրի ձևական պահանջների պատճառով գործնականում չեն կարողանում օգտվել իրենց հասանելի միակ պետական աջակցությունից։

Գյուղացիները հնչեցնում են այս ծրագրի արդյունավետությունը բարձրացնող բազմաթիվ օբյեկտիվ առաջարկներ, որոնց այդպես էլ ականջալուր չեն լինում և անհրաժեշտ լուծումներ չեն ապահովում օրվա իշխանավորները»։

Մանրամասն՝ տեսանյութում։