Փաշինյանը «խեղճ ու կրակ Նիկոլ» է բեմադրում

7or.am-ը գրում է․

Իր «դմփ-դմփ-հու»-ական վարկանիշի անկման ցածրակետում հայտնված Նիկոլ Փաշինյանը բնութագրական փի-առ քայլ է արել: Հրապարակվել է նրա 2022 թ. գույքի, եկամուտների, ծախսերի և շահերի հայտարարագիրը: Սույն եկամտային «կադաստրի թղթի» համաձայն` Նիկոլ Փաշինյանը գույքային առումով մի խեղճուկրակ, անունեցվածք, անգույք մեկն է, էն որ ասում են՝ անգամ ատամի սեփական չոփ չունի: Մի խոսքով՝ լիովին «խեղճ նիկոլ» կերպարի մեջ:

Չէ՛, լուրջ. ըստ ներկայացված հայտարարագրի՝ Նիկոլ Փաշինյանը չունի որևէ շարժական կամ անշարժ գույք, թանկարժեք իրեր: «Խե՛ղճ, խե՜ղճ Նիկոլ»,-կասեր կիսագրագետ Պողոսը, որ նրա մշտական ընտրողն էր, էն էլ կորոնավիրուսի տակ մնաց:

Ըստ հայտարարագրի` բանկերից մեկում նա ունի 3 մլն 15 հազար դրամ ավանդ, նրա եկամուտը կազմել է միայն նրա աշխատավարձը՝ 12,837,503 դրամ: Իսկ տարբեր բանկային հաշիվների վրա Փաշինյանը տարեվերջին ունեցել է 114 դրամ, հետո էլի մի 27000 դրամ, մի 3 դոլար ու էլի մի 150 հազար դրամ:

Ո՛չ ավտոմեքենա ունի (իր անունով), ո՛չ տուն, ո՛չ ավտոտնակ, ոչ էլ, երևի, լվացքի մեքենա կամ փոշեծծիչ (էն Արարատ Միրզոյանի ականջն էլ էնտեղ կանչի, տեսնես էն ապառիկը փակե՞ց, թե՞ հազիվ յուրայինի բանկի տոկոսներն է մարում):

Լավ, ինչի՞ համար է էս «ցիռկը»: Դեռ մնացե՞լ են ծայրահեղ դյուրահավատներ, որ կտցեն Նիկոլ-անգույքի մասին այս քարզչակուտը:

Թե բա՝ Նիկոլ Փաշինյանը հայտարարագրված շարժական կամ անշարժ գույք չունի...

Այսինքն, նա բացարձակապես մեր հաշվին է ապրում, ուտում, խմում, տժժում:

Այն, որ ինքն ու իր կինը՝ Աննա Հակոբյանը, թանկանոց կամ «բրենդային» հագուկապով են աշխարհով մեկ շրջագայում, պետբյուջեի հաշվին է: Այն, որ գերթանկարժեք ավտոներով է այսուայնկողմ երթևեկում, էլի պետբյուջեի հաշվին է:

Դե՝ «կառավարական դաչաներում» բնավորվելու մասին չենք ասի, հանրահայտ է: Ու անմոռանալի է նաև, թե ինչպես Նիկոլ Փաշինյանը ոչ միայն շտապեց օգտվել պետական առանձնատանը հաստատվելու հարցում, այլև թանկանոց վերանորոգում իրականացվեց առանձնատանը, հասկանալի է՝ պետական միջոցներով:

Այն, որ Նիկոլ Փաշինյանի պաշտոնավարման շրջանում Հայաստան 1 միլիարդ եվրոյի կոկայինի խմբաքանակ է ուղարկվում, դա հե՜չ: Չնայած, ո՞վ է կասկածում, որ նման գործարքներ հնարավոր էին բացառապես «Նիկոլ-անգույքի» իշխանության թաթախվածության, ամենավերևից տրված երաշխիքների պարագայում:

Այն, որ Նիկոլ Փաշինյանի կնոջ՝ Աննա Հակոբյանի գլխավորած, այսպես ասենք՝ «ընտանեկան» ֆոնդերին անանուն ու խոշոր փոխանցումներ են արվում, դա էլ, թերևս «սուտի բան» է, հա, ու ոչ մի դեպքում կառուպցիա չէ:

Այն, որ իր անմիջական «քաղաքական շրջապատը» հաշված տարիների ընթացքում դոլարային միլիոնատերեր են դարձել, դղյակների, ապարանքների, գերթանկարժեք բնակարանների սեփականատերեր, բիզնեսների ու ինչ իմանաս էլ ինչ նյութական բարիքներ տնօրինողներ, այդ ամենը... հե՜չ, իսկ Նիկոլ Փաշինյանի՝ «անշարժ ու շարժական գույք» չունենալը, իրենց կարծիքով՝ մեջ:

Այնպես որ, իսկը ժամանակն է, որպեսզի Երևանի քաղաքապետացու Տիգրան Ավինյանը լրջորեն մտածի Նիկոլ Փաշինյանին «3-ը՝ 4-ի վրա» մի փոքր հողակտոր նվիրելու մասին, ինչպես ասվում է՝ մշտական օգտագործման համար:

Ինչպե՞ս էր այդ բազմիցս մերկացված ստախոսը ասում. «Հայաստանն իմ օջախն է, ժողովուրդն իմ ընտանիքն է», դե, հասկանալի է, որ պետբյուջեն էլ իր գրպանն է:

Սույն օջախաքանդը անշարժ ու շարժական գույք չի հայտարարագրել: Ինքը անգույք է: Իսկ իր իշխանության մահաբեր դրո՞ւյքը:

Քանի՞ տուն ու օջախ է անզավակ թողել, քանի՞ ծնողի է որդեկորույս դարձրել, քանի՞ հազար մարդու է տունուտեղից, բնօրրանից զրկել: Քանի՞ գյուղ ու քաղաք է թշնամուն նվիրել ու քանի և քանի բնակավայր ու տուն է դրել թշնամական ուղիղ նշանառության տակ:

Չէ, նմաններին, կներեք, անգամ վերը ակնարկված «3-ը 4-ի վրա» հողակտոր չի հասնում: