կարևոր
4732 դիտում, 10 ամիս առաջ - 2023-05-29 15:00
Քաղաքական

Էրդողանի ընտրվելն ավելի շատ Ալիևն էր ցանկանում․ Էրդողանի ընտրության մեջ որևէ դրական բան տեսնելն ուղղակի քաղաքական անհեռատեսություն է․ թուրքագետ

Էրդողանի ընտրվելն ավելի շատ Ալիևն էր ցանկանում․  Էրդողանի ընտրության մեջ որևէ դրական բան տեսնելն ուղղակի քաղաքական անհեռատեսություն է․ թուրքագետ

Թուրքիայի նախագահական ընտրությունների երկրորդ փուլից հետո նոր նախագահ չընտրվեց, կուսակցությունների մակարդակով էլ որևէ լրջագույն փոփոխություն չեղավ, ամեն ինչ գնաց դեպի ավելի վատը։ Այս մասին Yerkir.am-ի հետ զրույցում ասաց թուրքագետ Անդրանիկ Իսպիյանը՝ անդրադառնալով Թուրքիայի ընտրություններում Էրդողանի վերընտրվելուն։

«Խորհրդարանն ավելի ազգայնական, հետադիմական է դարձել, իսկ նախագահ էլ շարունակեց մնալ Թուրքիայի գործող նախագահը, և տեսնելով, թե ինչ է տեղի ունեցել մինչև հիմա, կարող ենք կանխորոշել, թե ինչ կլինի հետո։ Մենք տեսանք, որ Հայաստանի իշխանությունների նախաձեռնած հայ-թուրքական հարաբերությունների կանգավորման նոր փուլը այս 1 ու կես տարվա մեջ ունի 0 արդյունք։ Ուղղակի պետք է հաշվի առնել Թուրքիայի իշխանությունների վերջին արձագանքները, օրինակ՝ «Նեմեսիսի» հուշարձանի հետ կապված իրենց արձագանքը, երբ Չավուշօղլուն հայտարարեց, որ Հայաստանի դեմ քայլեր կձեռնարկվեն և փակվեց Թուրքիայի օդային տարածքը հայկական օդանավերի համար, անգամ երրորդ երկիր մեկնող, սահմանը փակվեց նաև ՀՀ վարչապետ օդանավի համար։ Այսինքն, Թուրքիան դեռ այսքանից հետո շարունակում է շանտաժի քաղաքականություն վարել տարածաշրջանում և հատկապես՝ Հայաստանի դեմ»,- ասաց նա։

Նրա խոսքով՝ փորձել Էրդողանի ընտրության մեջ որևէ դրական բան տեսնել, դա ուղղակի քաղաքական անհեռատեսություն և կուրություն է․

«Հայաստանի իշխանությունները որդեգրել են ամեն գնով Թուրքիայի հետ հարաբերությունների կարգավորման քաղաքականություն և այս ֆոնին Փաշինյանի շնորհավորանքը անակնակալ չէր»,- ասաց թուրքագետը։

Անդրադառնալով Թուրքիայի ընտրություններից հետո հայ-ադրբեջանական հարաբերությունների կարգավորմանը Անդրանիկ Իսպիրյանը նշեց, որ Էրդողանի վերընտրվելով և՛ Թուրքիայի, և՛ Ադրբեջանի համար հնարավորություն բացվեց ձեռքերը երկարացնելու․

«Եթե մինչ այս Էրդողանը խուսափում էր ուղիղ առճակատման մտնել ԱՄՆ-ի, Արևմուտքի հետ, հիմա արդեն ընտրվել է և ավելի ազատ կլինի։ Էրդողանից հետո Էրդողանի ընտրվելն ավելի շատ Ալիևն էր ցանկանում, որովհետև դրանով կարծես իր հետագա քաղաքական ապագան կանխատեսվեր։ Ցավոք սրտի Ալիևի ձեռքերն հիմա ավելի կերկարեն և որևէ դրական բան, որևէ խաղաղություն՝ առանց նախապայմանների, Թուրքիայի հետ հարաբերությունների կարգավորում, այս ամենը չի կարող լինել, մեր իշխանությունները պետք է վերանայեն այս քաղաքականությունը»,- ասաց նա։

Թուրքագետի խոսքով՝ ՀՀ իշխանությունները կարծես չեն ուզում շեղվել այդ գծից․

«Ես, որպես ՀՀ քաղաքացի, կարծում եմ, որ պետք է հարևանների հետ լավ հարաբերություններ ունենալ, թշնամությունը հավերժ չէ, սակայն ամեն ինչ ունի իր գինը։ Թուրքիայի հետ հարաբերությունների կարգավորումն էլ պետք է լինի կշռադատված՝ մանավանդ հիմա, երբ էրդողանն իրեն զսպող որևէ ճնշում չունի դրսից, պետք է լինել շատ զգուշավոր, թե՛ Թուրքիայի, թե՛ Ադրբեջանի հետ։ Նրանք երբեք կանգ չեն առնելու, ինչքան փորձես զիջել, այնքան առաջ են գնալու, դրա համար պետք է մեկ անգամ ուղղակի պատմության էջերը թերթել»,- ավելացրեց նա։

Լ․Ա․