Չի բացառվում` Ստամբուլի ընտրության ժամանակ պայմանավորվածություն եղած լինի. թուրքագետ

Ստամբուլ քաղաքապետի` վերջերս տեղի ունեցած ընտրությունները ոչ միայն տեղական, այլև ընդհանուր ընտրության, վստահության քվեի նման մի բան էին: Այս մասին  այսօր լրագրողների հետ զրույցում ասաց թուրքագետ Տիրան Լոքմագյոզյանը:

Ըստ նրա` կարելի է ասել, որ Թուրքիայի նախագահ Ռեջեփ Թայիփ Էրդողանը կորցրեց Անկարան, Ստամբուլն ու Իզմիրը, կորցրեց Թուրքիայի ծովափնյա շրջանը, որը տասնամյակներ շարունակ եղել է Հանրապետական-ժողովրդական կուսակցության բերդը: Բանախոսը հստակեցրեց` Էրդողանի կառավարման հետևանքով էր, որ Թուրքիայիում տուրիզմը զրոյի հավասարեցվեց, իսկ դա տեղացիները չներեցին ու նրան ձայն չտվեցին, որովհետև ապրուստի հիմնական միջոցը տուրիզմն է:

«Էրդողանն ինքն է ասել` ով տիրի Ստամբուլին, կտիրի նաև Թուրքիային: Նա պարտվեց Ստամբուլում, ու դա մեծ հարված եղավ նրա համար: Թեև Էրդողանն ամեն ինչ արեց, որ Ստամբուլում երկրորդ անգամ ընտրություններ նշանակվեն, բայց նա ու նրա կուսակցությունը մեծ եռանդով չմասնակցեցին  երկրորդ ընտրությանը: Ընտրությունների ավարտից հետո երկու կողմից էլ միմյանց նկատմամբ բավական սիրալի արտահայտություններ եղան, որոնք կասկածելի էին»,- նշեց Լոքմագյոզյանը:

Ճշտող հարցին` այսինքն` ներքին պայմանավորածություննե՞ր են եղել, թուրքագետը դրական պատասխան տվեց: Մեկնեց` Էրդողանը գուցե մտածել է, որ ավելի լավ է ինչ-որ համաձայնության գալ, քան ռեսուրսներ ծախսել ու փորձել հաղթել ընտրություններում, ինչը նրանց համար բավական դժվար էր լինելու: