Այսուհետ Անին տեսնելն ավելի հեշտ կլինի

Հաջորդ տարվանից Հայաստանի 11-րդ մայրաքաղաք Անին տեսնելն ավելի դյուրին կդառնա: Ռուսական սահմանապահների կողմից պահպանվող սահմանային Նորշեն (Խարկով) գյուղ մուտք գործելու համար հատուկ թույլտվություն էր պետք:

«ՀՀ Շիրակի մարզպետ Տիգրան Պետրոսյանը մարզխորհրդի տարեվերջյան նիստի ժամանակ հայտարարել է, որ ՀՀ վարչապետի, ՀՀ տարածքային կառավարման և ենթակառուցվածքների նախարարի, Շիրակի մարզպետարանի և պատասխանատու մի շարք կառույցների հետ համատեղ ամիսներ շարունակ ձգվող աշխատանքի շնորհիվ պատմական Անի մայրաքաղաքի հարևանությամբ գտնվող տարածքի մուտքի ռեժիմը փոփոխվելու է եկող տարվանից, որի արդյունքում հայ մարդը և երկիր եկող զբոսաշրջիկները հնարավորություն կունենան հայկական կողմից ավելի հեշտությամբ մուտք գործել տարածք», - ըստ Yerkir.am-ի՝ հայտնում է Շիրակի մարզպետարանի ֆեյսբուքյան էջը:

Արցախի հերոս Արկադի Տեր-Թադևոսյանի հայրենի գյուղը պատմական Անի քաղաքից բաժանված է ձորով, և այնտեղից հրաշալի տեսարան է բացվում դեպի «հազար ու մի եկեղեցիների» քաղաք:

ՀՀ Շիրակի մարզպետ Տիգրան Պետրոսյանը մարզխորհրդի տարեվերջյան նիստի ժամանակ ՀՀ վարչապետ Նիկոլ Փաշինյանի կողմից «հայրենի հողին անմնացորդ նվիրումի և երկարամյա անխոնջ աշխատանքի համար» Շիրակի մարզի Նորշեն գյուղի միակ բնակչուհի Վահանդուխտ Մխիթարի Մելքոնյանին հանձնեց շնորհակալագիր և 500 հազար դրամ դրամական պարգև։

Վահանդուխտ Մելքոնյանը սահմանային Նորշեն բնակավայրում ապրում է 60 տարուց ավել, վերջին տարիներին Նորշենի միակ բնակիչն է, սակայն իրեն մենակ չի զգում, ամենապաշտպանվածն է համարում և չնայած արդեն 83 տարեկան է՝ զբաղվում է հողագործությամբ և մեղվապահությամբ: Պարգևը ստանալուց տիկին Վահանդուխտը հուզվեց ու նշեց՝ այսպիսի ուշադրության առաջին անգամ է արժանանանում: