կարևոր
2803 դիտում, 1 տարի առաջ - 2023-01-25 19:07
Աշխարհ

Թուրքիայում խստացրել են զբոսաշրջային կացության թույլտվություն ստանալու հայտերի ստուգումները

Թուրքիայում խստացրել են զբոսաշրջային կացության թույլտվություն ստանալու հայտերի ստուգումները

Թուրքիայի իշխանությունները խստացրել են զբոսաշրջային կացության թույլտվություն ստանալու հայտերի ստուգումները, հաղորդում է Haberturk-ը՝ վկայակոչելով պաշտոնական աղբյուրները։

«Թուրքիայում կարճաժամկետ կացության թույլտվության համար օտարերկրացիներից ներկայացված դիմումների վերահսկողությունը խստացվել է. ոչ նպատակային ներկայացված հարցումները մերժվում են»,-հայտնել է հեռուստաալիքը: 

Նշվում է, որ Թուրքիա ժամանող օտարերկրացիները կրթություն ստանալու, ընտանիքի հետ վերամիավորվելու, գիտական հետազոտություններ անցկացնելու, բիզնես սկսելու նպատակով, կամ էլ անշարժ գույք ունեցողները պետք է հայտ ներկայացնեն համապատասխան տեսակի կացության թույլտվություն ստանալու համար։ Դիմումն ուղեկցվում է անհրաժեշտ փաստաթղթերով, հաջող ստուգումից հետո քարտը տրվում է օտարերկրացուն:

«Զբոսաշրջային կացության կարգավիճակ չի տրվում այն օտարերկրացիներին, որոնք առաջին անգամ են ժամանում Թուրքիա եւ դիմում են ներկայացնում, բայց չունեն հաստատում, որ զբոսաշրջիկ են։ Այդ կապակցությամբ նրանք պետք է փաստաթղթեր ներկայացնեն, որից հետո իրականացվում է գնահատում, թե արդյոք թեկնածուն բավարարում է անհրաժեշտ պայմանները»,-նշում է ալիքը։

«ՌԻԱ Նովոստիի» հաղորդմամբ՝ ռուսաստանցիներն օտարերկրացիների շարքում առաջին տեղն են զբաղեցրել 2022 թվականին Թուրքիայում ստացված կացության թույլտվությունների թվով, վկայում են երկրի միգրացիայի վարչության տվյալները: