Խոսքի ազատության սահմանափակմանը զուգահեռ` Հայաստանը բարելավել է իր դիրքերը «Լրագրողներ առանց սահմանների»-ի վարկանիշում

Մինչ Հայաստանում շարունակվում են մամուլի դեմ ուղղված ոտնձգությունները, միջազգային հեղինակավոր կազմակերպությունները, ինչպիսին է «Լրագրողներ առանց սահմանների»-ն, նշում են, թե Հայաստանն «առաջընթաց» է գրանցել մամուլի ազատության ոլորտում:

Թե ինչի հիման վրա են նման եզրակացության եկել վերոնշյալ կազմակերպության անդամները, դժվար է ասել, բայց այն, որ մեր երկրում մամուլի ազատությունը վերջին տարիներին հետընթաց է ապրում, ակներև է:

Այսպես, օրինակ լրագրողներին ԱԺ-ում զրկել էին աթոռից ԱԺ խոսնակ Ալեն Սիմոնյանի անցնելու ժամանակ ոտքի չկանգնելու համար:

HayNews.am կայքի պատասխանատու Մհեր Եղիազարյանը իրեն վերագրվող կեղծ մեղադրանքների դեմ հացադուլ էր հայտարարել և մահացել բանտում 2019 թ. հունվարի 26-ին:

Panorama.am կայքի ֆոտոլրագրող Լիլիան Գալստյանին արգելեցին մտնել խորհրդարանի շենքը, քանի որ «լուսանկարել էր մետաղորսիչ սարքերով պատգամավորներին զննող ՊՊԾ աշխատակիցներին»:

Ալեն Սիմոնյանը նաև սահմանափակեց լրագրողների շարժը ԱԺ-ի շենքում. այսուհետ լրագրողները կարող են իրենց աշխատանք  իրականացնել միայն իրենց համար նախատեսված վայրում:

Մամուլի ազատության դեմ նմանատիպ դեպքերը բազմաթիվ են, բայց չգիտես՝ ինչ տրամաբանությամբ, արևմտյան կազմակերպությունները աչք են փակում երկրում մոլեգնող բռնաճնշումների վրա: